понедельник, 7 декабря 2020 г.

ТУМЕРЛӒ - 1930 ИВЛӒ ЛОШТЫ.

Суасла-марывлӓ. Колхоз "Ким" хресӓньвлӓ. Ӹленӹт Тумерлӓ солашты. Тидӹ Йынгы-Кушыргы гӹц 8 уштыш вел. Лач Чываксар-Угарман корны вӹлнок ылеш. Фотом иктӓ 30-шы ивлӓн Владислав Тетек ӹштен. 

Чуваши. Крестьяне колхоза «КИМ». Жители деревни Малые Тюмерли (Кĕçĕн Тÿмерле ялĕ). Чувашская АССР. Снимок 1930-х годов. Фото Владислава Тетек. 

Тишец нӓлмӹ - https://vk.com/club_kyryk_mary?z=photo260568672_457259277%2Fwall-2564602_6869

среда, 4 ноября 2020 г.

100 И МАРИЙ ЭЛ СӒНДӒЛӸКЛӒН

Шергӓкӓн мары халыкым 100 иӓш туан сӓндалӹкнӓн шачмы кечӹ доно! Цаткыды шулыкым, пуры шамым дӓ йӧнӓн ӹлӹмӓшӹм цилӓлӓндӓ согоньленӓ!

пятница, 25 сентября 2020 г.

ӸЛӸШТӒШВЛӒМ ӸЛӸЖТЕНӒ

 Шергӓкӓн кырык мары халык!

2013 ин Измаил Ефимов пиш кого пӓшӓм ӹштӓш тӹнгӓлӹн — тагынамок колыш фотограф Герман Юадаровын стёклан негативвлӓжӹм сканируен дӓ фейсбукышкы цилӓлӓн анжыкташ манын лыктын пиштен. Тӹ тошты фотовлӓ шукы эдемлӓнок чоте яратымы лин колтевӹ дӓ осовынжок шонгемшӹ ӹлӹзӹвлӓ лошты шӱмӓнгмӹ тотан ӓшӹндӓрӹмӓшвлӓм тарвӓтен ӹлӹжтӓревӹ.

Эртыш курым ӹлӹмӓш сӹнзӓ анзылан вуйта трӱк ӹлӹж кеш...

Техень шижмӓш ӹшке шӱм кӧргемӹмӓт пыдраташ тӹнгальӹ дӓ седӹндон Измаил ирӹкӹм пушат мӓ коктынат тӹ Юадаровын фотовлӓм кырык марын блогышкына вашташ тӹнгӓлӹннӓ. Тӹнӓмок шукы палшыкым весывлӓ доц кычышна. Кырык мары тӓнгвлӓ тошты фотовлӓштӹ эдемвлӓм пӓлдӹртӓш тӹнгалевӹ, а мӓжӹ тӹ лӹмвлӓм, лӹмдервлӓм дӓ цилӓ йиш пӓлдӹртӹшвлӓм подписьвлӓшкӹ пыртеннӓ. Тенге дружнан пӓшӓлӹшнӓ гӹнят сойток фотовлӓ лошты шукыжок лӹмдӹмде кодыныт...

Тӹ жепӹнок мӹнь Кырык Сир ӹлымӓш гишӓн руш йӹлмӓн ӓшӹндӓрӹмӓшвлӓм сирӓш тӹнгӓльӹм. Изин-олен тене сирен пытӓрӹшӹм, дӓ уже кокшы и Цикмӓ газет «Край горномарийский» тӹдӹм «лаштык-паштек-лаштык» семӹнь пецӓтлӓ. Газетӹн редакцилӓн, дӓ журналист Евгения Савельевалан тидӹ гишӓн пиш кого тау!..

А тагачыжы тӹ ӓшӹндӓрӹмӓшвлӓэмӹм цымырен книгӓм лыкташ йӓмдӹленӓ...

«Сам себе пишу я эти письма...» - техень лӹмӓн книгӓ лиэш. Пасна приложени модан блогыштыш тошты фотовлӓмӓт книгӓш пижӹктӓш тумаенӓ. «Фото Германа Юадарова из коллекции Измаила Ефимова» - тенге фотовлӓн авторствым переген анжыктенӓ. Фотовлӓ лӹвӓлнӹ цилӓ коммент-палшызывлӓн лӹмвлӓмӓт сирен шӹнденӓ.

Палшык тагачат чоте керӓл!..

Тишкӹ (http://hillmarygames.blogspot.com/p/blog-page_16.html ) фотовлӓм анжалаш пыремадӓ, дӓ осовынок папи-тьотивлӓдӓмӓт ӱжӹн пыртыдай - сарваленок ядына... Нӹнӹ вет эче эдемвлӓмӓт, вӓрвлӓмӓт, дӓ тамамат эче пиш керӓлӹм чоте яжон ӓшӹндӓрен-пӓлдӹртен кердӹт, а тӓжӹ ӱлнӹ комментарий окняшты фото номерӹм анжыктен цилӓ мам колыда тӹ фото гишӓн сирӓлтӹдӓй, пуры лидӓ, йӓ! Хыть марла, хыть рушла!

А эче ӹшке шанымашвлӓдӓӓт пиш керӓл лин кердӹт — ма вара сӓмӹрӹк ӹдӹр-ӹрвезӹн вуйыш лактеш тӹнӓмшӹ сӓмӹрӹквлӓм анжен? Тӹнӓмшӹ сиремӓн ӧлицӓвлӓм анжен тагачат нӹнӹм пӓлдӹртен мыштедӓ? Тӹшток ӓнят пӧртдӓжӓт кӹзӹтӓт шалга, ане? Но тама вес статянла чучеш? Сӹлнӹшаям шӱм кӧргӹштӹ кӹчӓл мода? Ада? Сирӓлтедӓ?

Коментӹштӹ ӹшке лӹмдӓмӓт сирӓш идӓ монды — мӓ обязательно цилӓ коментвлӓдӓм фотовлӓ лӹвӓк ваштенӓ, а сек раскыдывлӓжӹм книгӓштӓт анжыктенӓ! Эчеӓт — лӹмвлӓдӓм (аль сола йиш мыскылым псевдонимымат лиэш...) сирӓш идӓ монды.

Ти картинвлӓ вет мӓмнӓн изи Кырык Сирнӓн историм пайдарат, а книгӓ лӓкмӹк туан халыкна гишӓн пиш шукын пӓлӓш тӹнгӓлӹт!!!

Яратым мӱлӓндынӓм, туан йӹлмӹнӓм, культурынам, овуцавлӓнӓм Земля йӹрвеш пӓлдӹртӓш келеш — тенге мӓ КЫРЫК МАРЫМ яжоракын переген кердӹнӓ, ане вет?!

Халык ӹшкӹмжӹм цымырен дӓ туан йых корным пакыла дружнан иквӓреш шыпшын вел переген кердеш, тенге вет?!

Кырык Сир йӹрвеш школвлӓ дон библиотекывлӓ мыч ти книгӓм пецӓтлӹмӹк пожертвовани шотеш шӓлӓтен колтенӓ.

Книгӓн электрон-версижӹм икманяр кечӹ (кышты дӓ кынам - вара сиренӓ) цилӓн такешок пачын дӓ тӹкен нӓлӹн кердӹдӓ.

Кого тау, шергӓкӓн халык!!!

Пал Генай, Йынгы-Кушыргы

среда, 16 сентября 2020 г.

ОНДРИН ВАЛЬКА - "ЧАРЛИ"

Теве тиштӹ Ондрин Валькан "ЧАРЛИ" лӹмӓн книгӓм лыдаш лиэш. Аннотаци гӹц: "Чарли" - авторын нӹлӹмшӹ книгӓжӹ. Тиштӹшӹ произведенивлӓ 1991 — 1996 ивлӓн «Йӓмдӹ ли» газетеш пецӓтлӓлтӹнӹт. Тидӹ изи тетявлӓлӓн, школыш каштшы тыменьшӹвлӓлӓн лыдашышты. Масакла сирӹмӹ, тидӹм лыдмыкы, йӹрӓлтен колтет дӓ кымылетӓт куза лиэш."...

вторник, 8 сентября 2020 г.

Пал Генай, Йынгы-Кушыргы

Яра, рушла сирӓлтӹмемӹм сойток цилӓн ынгыледӓӓт сӓрӹдеок тиш лыктам...
***

Тау, Андрей Кричевский!
Спасибо, Андрей Кричевский!
***
Художники из Чебоксар Андрей и Лиза Кричевские уже живут в старинном доме, построенном 120 лет назад на берегу пруда в самом сердце моей любимой деревни Юнго-Кушерга (ударения на "Ю" и "у")...
Я не знаю как объяснить мою ревностную привязанность к данному событию (если не считать того, что в этой деревне прошло мое счастливое детство...), а потому просто опубликую два рифмованных текста (коль хотите, то стихами их назовите...). Один текст на горномарийском, а второй должен был стать переводом на русский, но взбунтовался и воспроизвелся как самостоятельный...
***

АМАСА

Амаса пачылт кемӹк – ӓнгӹремшӹвад
Пырыш эдемӹм ямшы ӹлӹш лош вӹдӹлеш...
Ит шудал тӧрӧк ӓптӹрген нерат,
Дӓ ит талашы комбы шылдыр дон ӹштӹлӓш!...
.......
...Анжок! Шытыр комы стан... мӹнер лаштыкат!...
...Пӹзӹлмӹ ваштыр таманяр и киӓ -
кажланен, перегалтӹн, жепӹм ӓен-такыртен!...
...Кайыкла коэштӓлтеш пӧрт йых - виӓн...
Сӹнзӓэт пачылт кеӓ – тӹньӹм шамде мӓгӹртен...
.......
...Ӹндежӹ кыш шагалат тошты тум седрӓш?
Тӧр вӓр тӹлӓнет пачеш уждым кӹлӹм!
Вӓшӓкӹш ит пыры – каранг тӹ вӓр гӹц шӹлӹн
Кӹлештен тӹдӹ кердеш курым вашт!
.......
...Окнявлӓ лош пӹзӹрген лагы пӹжӓш
Сарвала тыньӹм йукын уждым кек:
«Шынгалай шавырым! Палшалтай йӓ ӹлыжӓш!
Тӹ шавыр гӹц шылдырем пачылтеш вӹлвек!»
.......
...Тек! Пыйген толын пыйта пыйхаш цаца...
Тӹнь тӹдӹм кердӓт кычен - вет керемет
тум тӹнгеш видӹлт шӹнзӹн:
«Тӹнгӓй йӓ! Керемет!
Каремӹш валы! Вӓрӹшкет кенвац!»
.......
...Шӹкш куза – момоцаштет кловой шӹрем -
Ит пыры тӹш тылшол якшаргымеш!
...Мӹнь каркам нӓлам шолшы падыш шырем,
Кӱэр лош кӹшкем кӓпет пӱжӓлтмеш...
.......
Ну, яра! Шачмы кечӹн тӱгӹ йӓрӓн лӓктӹт(?)...
Кыш вара ӹне кышкыжмыла кышкыжмын(?)...
Шарыкым шӹшкӹлмӹлӓ ма вӹргечӹн(?)...
Изӓрнян изӓрня пазарыш каштыт(?)...
Когарнян кого ӓрнявлӓм ма пачыт(???)...
Дӓ Кукшыгечӹн кечӹм куштылгемдӓт(???)...
А Рушӓрняжын - Кырык Сирым... ма? Рушемдӓт(???)...
.......
Вадеш шӹц пӧртанзыл ташкалтышыш -
Ӓштӹ ма, сӹнзӓэтӹм алтален, шана шӹлӓш -
Тӹ ужмашвлӓ курым вашт палшалтат ӹлӓш!
Лач ялкорнетӹм ит монды шачмы туан лыкыш...
.......
Тенге шанен корны мычкы шӹрен лӓктӓм
Сӹнзӓм кӓрем - пӓлдӹртӹшвлӓм погем лоэн
Шӹре шакте вашт шӹм рӓдӹ нӹнӹм вактам,
Угӹц ӱдем, кӹшкем-самлем-ушем... Шоэн
вара цӓшӓн ирӹк жепӹм йонгештӓрӓ!
.......
(Лачок вет - шоэн вел...)
.......

.
Эчеӓт йӹрвеш кажланаат – мӱлӓндӹнӓ пыт самлана...
Кугижӓн пурлыкым вычен шоте цилӓн чоте орланат...
Анжок! Кӧргӹштӹштӹ ик ӹлӹштӓшӓт ӹлӹжте -
Кугилӓшкӹ ке! Йыл сирӹш лӓк! Йукетӹм вӹцкӹжтӹ!
Кырык Сирнӓ пиш кого! Мӱлӓндӹнӓ изи гӹнят!
Шӱм кӧргӹнӓ яргата! Тум важан йӹлмӹнӓ!
Кӱкшӹ тум эхельӹштӹ перегӓлт кодат тӹнят!
Рокыш шынгалтын -
Йӓнгвлӓштӹдӓ ӹлӹжӹнӓ!
.......
...
.

***

ДВЕРЬ

Хочешь верь, а хочешь не верь -
Я найду, и открою дверь
В старый дом с паутиной и патиной,
С крышей латаной-перелатаной...
...Я войду и встану под матицей,
Где хозяин истёр до блеска
Половицу сосновую задницей -
От рожденья до смертного всплеска...
...Оберег из рябиновой веточки
Передаст мне засохшую весточку...
Ткацкий стан с недотканой холстиной
Скрипнет тихо в углу без причины...
...Коромысло, ухваты и косы
К косяку прислонились без спроса...
Печка старая вся отсырела
Без трескучего жаркого дела...
...Загляну в фотографию мятую
Еле видно, что год тридцать пятый -
Там хозяин ещё не распятый
За "кулацкую суть распроклятую"...
...Меж окон принасестилось гнездышко -
Дрозд когда-то в нем высидел выводок...
Клён высокий дом прятал от солнышка,
Но срубил его вовсе не выродок...
...Распахнулось над крышей дырявою
Небо синее - бело-кудрявое,
А вокруг улыбаются скрытные
Избы старые, вглубь самобытные...
...И нежданно в стекле затуманенном
Нарисуется лик любознательный -
Улыбнётся... И знак восклицательный
Над деревней взлетит дымом пламенным
...
Отзовётся ль моя Юнго-Кушерга
Гостю новому добрыми мыслями:
"Ат шушырты гӹнь шкежӓт ат шушыргы!"*
И другими понятными смыслами...
.......
...
.
(* "Не рань других и сам не будешь ранен!")


Скриншоты отсюда: https://www.facebook.com/breakingmash/videos/686865891910872
и отсюда: https://www.youtube.com/watch?v=JJDMyOKIBro

среда, 2 сентября 2020 г.

КУТР МИХАЛАН ПӦРТ (ИЗБА КУТР МИХА(И)ЛА)


Теве тиштӹ пиш яжо видео - КУТР МИХАЛАН тошты пӧртжӹм у хозавлӓ анжыктат.
Тидым анжен пиш сусу лин колтышым - вет Лиза дӓ Андрей Кричевскийвлӓ ти томам сӹлнештӓрен вел пакылаат урдат.
Художниквлӓ ылыт!!! Седӹндон вес йишлӓ лин ак керд!
Кого тау тӓландӓ, шотеш пиштӹмӹ Лиза дӓ Андрей!
Пуры лижӹ тӓлӓндӓ яратымы Йынгы-Кушыргыштына ӹлӓш!
Пӓшӓдӓ ашныжы!

Вот здесь на видео старый дом КУТР МИХА(И)ЛА нам показывают его новые хозяева.
Я обрадовался и сильно расчувствовался по этому поводу - ведь Лиза и Андрей Кричевские будут беречь этот дом как уникальную краеведческую и творческую удачу.
Потому что они художники!!! Потому что по другому и быть не может!
Сердечное вам спасибо, уважаемые Лиза и Андрей!
Счастья и добра вам в нашей любимой Юнго-Кушерге!
Творческих удач!

вторник, 1 сентября 2020 г.

КОК ПАЧАШАН КӒМӸНИ ТОМА (ӓль - КУТР МИХАЛАН ТОМАЖЫ...)

Ондрин Валька, Йынгы-Кушыргы

Ти кӓмӹни томам кынам ӹштӹмӹ, амат пӓлӹ, тӹдӹ со томана ваштареш ылын машанем. Тӹдӹ, кок пачашан ылеш дӓ солана лапы пун томавлӓ сага кӱкшӹрӓклӓ каеш. Мӹнь пӓлӹмем семӹнь, ти томашты Кутр Михала Лисавет шыжаржы дон коктын ӹленӹт, солашты шыжаржым Лиса маныт ыльы. А эче Фелицат куакам шайыштеш ыльы, эртӹшӹ курым 20-30 ивлӓштӹ ти томан кокшы пачашыштыжы школ молы ылын, Кушыргы сола тетявлӓ тиштӹ пӹтаришӹ пӓлӹмӓшвлӓм нӓлӹнӹт. Мары грамматикым ти школышты изиш вес семӹньрӓк сирӓш тымденӹт. Куакамат тиш тыменяш каштын дӓ "юк" вӓреш "йук", "янгеж"-"йангеж", юалгы"-"йуалгы" тенге сирӓ ыльы. Ти школ "ликвидация безграммотности" программыш виднӹ тӹнӓм пырен дӓ тиштӹ кок классым лач тымденӹт. Самой томаштыжы ӹлӹшӹ семья гишӓн шукыжымок мӹнь ам палӹ, пӓлем лач, вырсы годым кок ӹзӓк-шоляк-ге: Михала дӓ Петр войнашкы кенӹт дӓ Петржӹ 1941 инок немӹц пленӹш вӓрештӹн, тидӹ гишӓн Исюткан солашты шачшы, тымдышы дӓ поэт, Павел Иванович Андрианов, "Ленин корны" газетӹшты сирен ыльы, нӹнӹ пленӹштӹ иквӓреш линӹт, а вот Кутр Петржы, ӹжӓл, техень нелӹлыквлӓм тырхыде, военнопленныйвлӓ лагереш ясланен-шужен колен. А Кутр Михалажы кӓпшы дон чоте кӱкшӹ-кужы ылынат, тӹдӹ война гач ик гарнизон коммендатуры ротышты служен, дӓ даже тӹдым 1945 ин 24 июньын Москва Сӹнгӹмӓш парадыш нӓлӹнӹт и тӹдӹ йӓл сага строй дон Красный площадь мыч ашкед кеен. Техень статус донжы пиш когоэшнӓ ыльы, а кыце агыт, вет Кушыргышты да йӹрвӓш техень парад участникшы ылдеӓт. Кутр Михалан томажы дӓ анпичӹжӹм анжаш гӹнь, тӹдӹ пиш яжо вӓрӹштӹ вӓрлӓнӓ, Михала ӹшкежӹ пиш пӓшӓ мастар ыльы, мӱкшӹмӓт анжен, ӓнпичӹштӹжӹ шукы олмаву кушкыныт, изинӓ годым мӓ тӹш олмам шолышташ молы пыреннӓ, мӹнь даже тидӹ гишӓн ик тетялык шайыштмашым сиренӓм, "ӒЗӸРЕН" маналтеш, тидӹм "Чарли" (Йошкар-Ола,2008) книгӓштем лыдаш лиэш. Кутр Михала, лачокат, со млоецлаок, курымжы ӹдӹрӹм нӓлдеок ӹлен. Телӹм, пичӓлӹм туп гач сӓкен, ечӹ дон морен кычашат каштыкала ыльы. Но вот жеп пиш йӹле эртӓ...Ӹнде кӹзӹт ӹшкежӓт уке дӓ Лисавет шыжаржат колен кеш. Таманяр веремӓ ти томашты Яштуга сола родняжы ӹлӓлӓльӹ, вара ик фермер усайбыжым кычылты, а остатка жепӹн иктӓт уке...Тома тӹхӓлӓкок шӹнзен. Солашкы толмем йӹде со ядам: "Иктӓжӹ тиштӹ ӹлӓт?"- "Иктӓт агеп, томажы выжалалтеш",- маныт. Но теве тилошты Кутр Михалан томажым Чебоксарышты ӹлӹшӹ эдем нӓлӹн, маныт. Ой-ой, Чебоксаржы вет мӓ дорцна лишӹл агыл, кӱ вара техень тиш толаш йӓмдӹ лин шӹнзӹн? Художник тӹдӹ ылеш, маныт. Анжем, Кутр Михалан томажы сага кок машина шалгат, томажым тӧрлӓш да уэмдӓш тӹ художникет рабочийвлӓмӓт уж канден , тонна моло ышкалым урдатат, нӹнӹлӓн шешкӹ шӹшерӹм моло выжалем манеш доко. М-да...Художник толын! Кушыргышкына художник толын! А кыце техень яжо вӓрӹш художник ак тол? Солана йӹр кымдыкеш техень цевер сӓндӓлӹк киӓ, техень сӓндӓлӹк! Эдемвлажӓт тишты яжовлӓ ӹлӓт. Тидӹ гишӓн эче америкӹштӹ ылӹшӹ солана блогер Пал Генайат ӹшке сирӹмӹвлӓштӹжӹ пиш яжон келесен. А ӹнде ти художник доно яжонок пӓлӹмӹ лиӓш келеш ылнежӹ дӓ тӹдӹн гӹц мӓмнӓн велнӓм сӹлнештӓрӹмӹм вычен кодына гӹнь, ана самынялт сӓй.
МЫРЫ СЕМНӒЖӸ
ЛИЖӸ КУШТЫЛГЫ,
ШАЧМЫ ВЕЛНӒЖӸ-
ЙЫНГЫ-КУШЫРГЫ!

вторник, 4 августа 2020 г.

ТЫВЫРТЫШ ПАДКАГЫЛЬ

Пал Генай, Йынгы-Кушыргы

Тывыртыш падкагыльым когон яратем! Ыржа лашашынжым эчеӓт когон! Ӓштем, ӓвӓм, тётьТоня дӓ Лия-ӓкӓм шим куды анзылны тошты, шӱдӹ иӓшок агыл вӓл, стӧл йӹр погынен падкагыльым тышкен шӹнзӓт ыльы. Тӹ жепӹн кудышты тыл йыла, тагынамшенок сыцангшы падышты вӹдӹм шолта...

Куды левӓш вашт шӹкш куза, кым шонгы пистӹ йӹр вӹдӹлӓлтеш... Бобикнӓ будкажы гӹц тагыш кӱшкӹлӓ анжа – тӓ шӹкш кишӓм, тӓ шӹнгӓм, тӓ вӓрӓшӹм ужын тамам тумая..., тӓ ӱӓн падкагыль лаштыкым выча... Пуэм седӹ, но варарак, ӹшке качмыкна вел... Цӹвӹвлӓӓт стӧл лишкӹрӓк погынат – ӓнят сыкыр лаштыкым вычат, ӓнят падкагыльым?... ТетьТоня Геля-шыжаремӹм сӹгӹрӓ дӓ цӹвӹм пукшаш ядеш – ӹлцӹк, нужер, пӹрцӹ, тури... – «Кужы тӓгӓнӓэш тяпкӓ дон иквӓреш роэн-падрештен-пыдратен шӹндок!» Цӹвӹвлӓ тӹдӹм колын изи шыжарем паштек тӧрӧк сарай анзык кыргыж миэвӹ дӓ йукын сарвалаш тӹнгӓльевӹ: «Ко-коо-коооо-кооооооо! Кыд-кыыыд-кыыыыыцеее! Пӹ-пӹӹр-пӹӹыӹрцӹӹӹм! Пу-пууу-пуууууайййй! Йа-а-а-а-пуууу-а-а-а-аййй!»

Теве падышты падкагыльна уже пыт шолеш, йӓмдӹ векӓт. Лия-ӓкӓм ваштыр гӹц тодын пидмӹ кого савалам нӓлешӓт кӱн шошы падкагыльвлӓм кого плошкаш чоте пӹсӹн опта. Вара вес тышкым партьым уша вӹлвец шолшы вӹдӹш переген шӹкӓ. Льоп-льоп-льоп! Падкагыльвлӓ вуйта тура сир гӹц келгӹ Кого йӓмӹшкӹ нӱштӹлӓш тӹргӓт...

Изи кӹртни плошкаштӹ шӹрӓтӹм ӱм тыл сага ӹрӹктӓт. Мӹнь тӹдӹм оролем – ик сыц лаштыкат, ик тылипӓт тӹш ӹнжӹ попазы...

...Ӓтям пӓша гӹц кыдал миш. Цилӓн тӹ стӧл йырок погынен шӹцнӓ. Стӧл вӹлӓн косир пеледӹшӓн шӓртӹшӹм пиштӹмӹ – Лия-ӓкӓм Йошкар-Ола гӹц нӓлӹн подарка шотеш канден векӓт. Пиш тошты пистӹ пу гӹц пӹчкеден лыкмы плошка тӹр якте кӱктӹм падкагыль дон темӹмӹ – тӹдӹн вӓржӹ стӧл покшалны. Сагажок шӹрӓтӹм ӱ плошка...

Церот дон шокшы падкагыльвлӓм кид доно нӓлын ӱ плошкаш шыренӓ дӓ качкына... Пиш когон тотлы!!! «Эй сасна игӹвлӓ! Ӱдӓм идӓ патькыкты!!!» - шыжарем дон вӹкӹнӓ анжен ӓвинӓ костанла чучнежӹ, но мӓ воксьок ана лӱд дӓ иктӹ паштек весӹм церотдеок кого плошка гӹц тӹкен качкына. Коговлӓжӹ тӹ жепӹн тотлы ӓрӓкӓм йӱлдӓлӹт – ӓтям «Кагорым» лапкана гӹц нӓлӹн валтен. Мӓат тӹ мӱӓн ӓрӓкам чоте яратенӓ, но мӓланнӓ лач ӥӹлмӹ мӹчашым цӓркӓш шыралаш вел пуат... Варарак цыланыш йывырт пырен мӹнь охыр ямдарым "пынзалын" эче ик-кок патькышым нелӓм... Ай-яй махань тотлы!)

Вады... Йуалгаш тӹнгалеш... Ӓтям телевизӹр анзылан диванеш вазын сырам подылеш. Тонышы ӹшке шолтым кырык марын сырам мӓлӓннӓӓт йӱӓш пуат. Пиш яжон тӹ сырам тётьТоня дон ӓвӓм шолтат – пашкудывлӓ дӓ хынавлӓ со нӹнӹм хвалят токо...

Мӹнят тӹ сырам шӹвӹльвӹд йогымеш кӹзӹтӓт, 60 и эртӹмӹк, яратем...

Но, ӹнде нимаат тӹ жеп гӹц уке... Сыражат, падкагыльжат, шим кудынажат...

Яратым семняэмжӓт пӹтен – лач изи Геля шыжарем дон вел кодынна дӓ икӓнӓ иктӹм тангыж гач элтӓлен тӹ жепӹм сӹнзӓвӹд вашт анженӓ...
...
P.S. Мӱлӓндӹнӓ чоте изи ылеш а туан Кырык Сирнӓжӹ пишок кого!


ПЕЧКА РУШ

Шергӓкӓн халык!

Ти мадмашым тама ӓнят ам ӓшӹндӓрӹ токо...
Тӓжӹ тенге мадында вара?

Пал Генай, Йынгы-Кушыргы

(Тишец нӓлмӹ: https://vk.com/feed?w=wall-2564602_6357)
... 

Горномарийская народная игра «Печкӓ Руш!» («Камака руш») 

В центре или где-либо на окраине горномарийской деревни крестьяне устраивали уголки веселья, отдыха и труда. В музее под открытым небом г. Козьмодемьянска отражены основные элементы для развлечения наших предков. Это скамейка, качели, станок для размягчения холста, станок для распиловки бревен на тес вручную. Такой уголок в прошлом являлся местом развлечения, свидания, отдыха молодёжи и детей. Размягчением холста молодые женщины и девушки занимались обычно в начале мая, в апреле, когда подсохнет земля, когда появится первая зелень. Колотили холст на бревне специальными колотушками попарно: две, три, и даже по четыре и более пары. Для размягчения холста искали по лесу только резонансные ели, которые считались музыкальными, потому как издавали необычный звук. При колочении колотушками, звук распространялся не только в этой деревне, но и даже далеко-далеко в соседней. Услышав перезвон, на этот стук шла молодежь с гармошками, балалайками, чтобы встретиться и повеселиться. Девушки при колочении распевали трудовые песни, а те, кому не досталось места на станке, подплясывали под ритмичные отзвуки колотушек. Качели - устройство для качания ради забавы. Их устраивали в деревнях ранней весной. Днем качались ребятишки, а вечером здесь собиралась сельская молодежь. В горномарийских деревнях, в летний период, после тяжёлой работы было принято собираться на посиделки. Молодёжь собиралась и на лужайках, и на скамейке у избы или где-либо в укромном местечке. Таким образом, в средней деревеньке насчитывалось 6-10 группировок - посиделок. На посиделках люди получали или какую-то жизненно важную информацию или же духовную пищу, оптимистический настрой для дальнейшей жизни в сложный период. Таким образом, люди культурно отдыхали и самоутверждались. Но и выбирали себе по вкусу симпатизирующие пары. И, в конечном итоге, создавались новые семьи. В летний период времени на посиделках люди любили поговорить о житье-бытье, попеть различные песни, поплясать под аккомпанемент каких-либо музыкальных инструментов. У горных мари также весьма распространены были как музыкальные инструменты гребешок и катушка, на отверстие которой накладывается тонкая береста. Надо отметить ещё один довольно любопытный «инструмент», пользующийся у молодёжи особым признанием, - это обыкновенный листик ивы, сирени, клёна или черёмухи. А иногда и просто травинка. С помощью них девушки и женщины насвистывали любую мелодию и довольно часто импровизировали. Бывало так, что весной в сумерки после работы одна или две девушки-подруги начинают насвистывать свои любимые мотивы. И мотивы в тихую весеннюю пору были слышны во всём округе. Очень часто в ответ на другом конце деревни или даже из соседней деревни раздавался такой же свист, в этот самобытный хор включались всё больше и больше исполнителей, и на некоторое время весь округ наполнялся мелодичным свистом. На посиделках так же играли и в разные игры. Мы с вами сможем изучить Горномарийскую народную игру «Печка Руш!» («Камака руш»), которую сотрудники этнографического музея привезли из экспедиции от старожилов горномарийского района. Горномарийская народная игра «Печка Руш!» («Камака руш») Игра рассчитана на большое количество людей. Игроки встают по четыре человека, образуют группу «печка». Организовывается несколько «печек». Выбранный «Водящий» обходит все «печки» с диалогом: 1)- Печка-то горит? -Да, горит. Пироги пеку. 2) - Печка-то горит? -Да, горит. Блины пеку. И так далее. Подходит к следующей печке: 3)- Печка-то горит? -Нет, не горит. Что-то с печкой случилось, не могу поджечь. Тогда «Водящий» выкрикивает: - Печка «Руш!» («Камака руш») И в этот момент все игроки меняются местами, создают новую «печку». Кто не успел попасть в группу «Печки», тот становится «Водящим». Игра начинается заново. 

МУ «Козьмодемьянский музейный комплекс» старший научный сотрудник отдела по национальной культуре Акцорина А.Я.

суббота, 18 июля 2020 г.

ИЗИ ШӸНДӸР

Первиш Изи Шӹндӹр гишӓн теве рушла сирӹм шайыштмашым интернетӹштӹ монна.
Анжалдок...
...

К 100 - летию РЕСПУБЛИКИ МАРИЙ ЭЛ и ГОРНОМАРИЙСКОГО РАЙОНА.
Событие, изменившее жизнь.
Вот уже исполнилась 40 годовщина со времени принудительной ликвидации старинного марийского села Малый Сундырь. В 1980 году, с завершением 1 этапа строительства Чебоксарской ГЭС, состоялось массовое переселение деревень попадающих в зону затопления.
Одним из таких населённых пунктов было село Малый Сундырь Виловатовского сельского поселения.
Это одно из древнейших сёл района имело несколько названий.
В старину это село называлось Акозино, так как по преданию, здесь находилась резиденция сподвижника Акпарса - сотного князья Аказа.
Кроме официального названия ещё было церковное название - Троицское, в честь одноимённой церкви. А в народе это село называли по своему - Изи Шындыр, Попсола, Церкысола.
В 1740-х годах здесь была поставлена церковь, а в 1822 году появилась частная школа Померанцева.
Раньше, как летом, так и зимнее время, сообщение в основном осуществлялось по Волге. Летом на лодках, а зимой лошадьми на санях. Поэтому село Малый Сундырь в те времена находилось на очень оживлённом месте и на перекрестке дорог. Это село выполняло роль центра округи, куда входило и село Виловатово. Только священнослужителей, проживавших в восьми дворах вместе с детьми, насчитывалось здесь 44 человека.
В документах за 1898 год отмечено, что в этом селе находилась квартира полицейского стражника, два земских училища, фельдшерский приёмный пункт, водяная мукомольная мельница, 2 торговые" мелочные лавки," 2 трактира.По понедельникам здесь собирался базар - "Шачмы пазар. " Раз в год, на церковной площади, устраивалась сельская ярмарка - "Торжок в день Святой Троицы". В старину здесь, у подножья горы Алам - Нер, широко и шумно отмечалась масленица.
Любил сюда приходить и Спиридон Михайлов - первый этнограф нашего края. Он писал : "Дорогою частенько мне попадались молодые черемисы, ехавшие в гости к родственникам с хорошенькими своими жёнами, разряженными как маков цвет. Они одеты были в зелёные из тонкого сукна кафтанчики, подпоясанные широкими шелковыми ткаными поясами с серебряными украшениями....На шее висело множество серебряных и оловянных крестиков...Упряжь на лошадях была прекрасная, с медным набором и бубенчиками.
...В селе на просторной площади раскинуты были уже палатки с пряниками, орехами, конфетами. Черемисские парни катались на щегольских своих санях. Часто катали они девушек, угощали их конфетами... А детвора в это время катались на салазках с горы."
Село Малый Сундырь к концу 1980 года было окончательно разрушено, так как ожидался подъём воды. По плановой отметке 68 м. над уровнем моря должно было затопить и Малосундырскую церковь, но к нашему счастью , воду подняли только на отметку 63 м. и то место, где находилась село Малый Сундырь не полностью ушло под воду.
В настоящее время стараниями настоятеля Усолинской церкви, отца Александра и верующих, церковь начала восстанавливаться. И вполне возможно, если уровень Чебоксарского водохранилища не будут поднимать дальше, это старинное намоленное место получит дальнейшее развитие. Хочется верить, что вокруг восстанавливаемого храма, по примеру села Сумки, как птица Феникс, год за годом, дом за домом возродится и это старинное марийское село и звонкие ребячьи голоса, оповестят о начале новой жизни.

Тишец нӓлмӹ.

четверг, 18 июня 2020 г.

СОЛАШТЫ ВЕЛЕ

Софроний Гайдов, Лидӹвуй

Солашты вел лывыргы йӓнгем,
Кынам попалта ӓвӓн шӱм,
Кынам садвичӹш выртеш лӓкнем,
Дӓ шыла, пӹтӓ халан сӱм.

Солашты вел ладнангеш йӓнгем,
Кынам сагаэм ласко тӓнгем,
Кынам йӹрвӓшем олма сад.
Дӓ шолеш ӹлӹмӓшӹн пад.

Солашты вел кӓнӓлтӓ йӓнгем,
Кынам цӹвӹлтӓ ирӹ лыпш.
Цевер шӹдӹрвлӓ йӹр мӹнь сӓрнем,
Дӓ чӱкта эче иктӹм ыш.

Солашты вел ӹлӹжеш йӓнгем,
Кынам ныр капка выча виш.
Кынам первишӹ эче пӓнгеш.
Дӓ ӹлӹж кеӓ мимык лиш.

Солашты вел ӹвӹртӓ йӓнгем,
Кынам ашкедӓм нырвлӓ гач.
Кынам кымылым пурым шӓнгеш,
Дӓ ӱжӹт толаш тӓнгвлӓ пац.

воскресенье, 14 июня 2020 г.

КЫШКЫ АНЖЕТ...

Пал Генай, Йынгы-Кушыргы

«Кышкы анжет сынзӓм карен, кышкы - чӱчӹн?» -
Шонгы тӓнгӹм ядым шужгыш тангыж гач.
- Амат пӓлӹ? Тамам ужам, тама - чучын...
Тыргыж коэм цӓртем кӧргӹш шӹлӹн лач...

Кугижӓн окняшты ужам иктӹм -
Шокшы кӓнгӹж, цевер туан вел...
Косир диктор у тыгырым виктӓ -
Чиэм, лӓктӓм... Ӧрӓм! Тӱнӹ - тел!!!

Сӹнзӓм чӱчӓм - лӱдӹктӹш тӹтӹрӓ
Кӱшӹц вала халык корны вӹк...
Кок вуйан кек вуйвлӓ кӧргӹш пыра
Шамым качкын кушкеш уждым кек...

Сола мычкы колам пӹльдӹр йукым -
«Котим каля поктылеш ирвец!»...
Саслен пыртат пӧртӹш кайдым сӱкӹм -
«Мӧскӓм шыра кӹзӹ вадывец!»

Кырык Сирӹм пӓлдӹртенӓ мырен
Айо шӓрлӓ и гӹц иш - йӹрвек...
Мары йӹлмӹм мыры кӧргӹш шырен
Сӹлнӹм пӹзӹремдӓ уждым кек...

Йыдпел шамак туан вӓрӹш пыра
Кугижӓн окняшты кок вуян кек вел
Туан окням чӱчеш чӹнь тӹтӹрӓ
Важна кошкен ак ям вӓл, шӱмбел?..

...Шонгы тӓнгем йукым лыкташ цӓрнӹш
Вуйым сӓкен тагыш пырен кеш...
Тангыж гач сӹгӹрем – «Толеш кӓнгӹж!
Ит ям – вӹдӹм кӹшкӹмлӓ йӹрвеш!!!»

среда, 27 мая 2020 г.

ИЗМАИЛ ЕФИМОВЫН КАРТИНВЛАМ ГОНКОНГЫШТЫ АНЖЫКТАТ

Шергӓкӓн халык!

Художник Измаил Ефимовын пӓшӓвлӓм Гонконгышты земля йырвеш погымы мастарвлӓн пӓшӓвлӓ дон иквӓреш анжыктат.
Ти выставка 16 майын пачылтын дӓ 30 август якте кеӓ.
Измаил гишӓн видеошты 1:03:12 вӓр гӹц шайыштыт. Тӹшток ик картинжӹмӓт анжыктат.
Анжыдок тиштӹ да ӓлдок иквӓреш сӹлнӹ мастарна верц когоэшненӓ!

понедельник, 27 апреля 2020 г.

ИЗМАИЛ ЕФИМОВ: МАРЫН ШӰЛӸШ ЕВРОПЫШ ВӸСӸШ...

Пуры лижӹ, шергӓкӓн Кырык Сир!
Ӹнде кырыкмарын талантан художникӹн, Измаил Ефимовын, вес йиш творчествыжым анжыктенӓ.
Теве тиштӹ "этнофутуризм" лӹмӓн партьыжы гӹц Измаилын кымлы картинжӹм анжен кердӹдӓ.
Мам вара палдӹртедӓ тӹ цӱдейӹктӹш чиӓӓн кишӓвлӓ мыч кен дӓ пӹтӹрӹмӹ-пидмӹ-ялштымы-ушымы-куштымы... ӧрӹктӹш образвлӓм Измаилын мӹнервлӓштӹ вӓшлин?
Ти пӓшӓвла вес сӓндалӹкӹштӹ перегӓлтӹт - а такшым лӹмлӹ художник Измаил Ефимов этнофутуриствлӓ лошты чоте яргата мастар ылеш да шанеда гӹнь интернетӹштӹ эче пиш шукы этно-шӱлӹкӓн картинвлӓжӹм ӹшкежат мон кердӹдӓ...

суббота, 14 марта 2020 г.

Чаломкин. САМ СЕБЕ ПИШУ Я ЭТИ ПИСЬМА (Часть пятая - ФРАНЦУЗСКИЕ БОТИНКИ).


Тагачы рушла сирӹмӹ ӓшӹндӓрӹмӓшвлӓэмӹм сирен пӹтӓрӹшӹм сӓй...
Теве тиштӹ вӹзӹмшӹ лаштыкым лыдын кердӹдӓ.

Сегодня я, кажется, завершил воспоминания о своём детстве и юности.
Вот здесь вы их можете прочесть.

понедельник, 9 марта 2020 г.

ИЗМАИЛ ЕФИМОВ: КЫРЫК СИР ЦЕВЕРӸН ЧИӒМ КУРЫМ ВАШТ ЙӸРВЕЛ КӸЧӒЛӒМ...

Кырык Сир мыч Измаил Ефимовым цилӓнок пӓлат. Ти художник нӹллӹ и кытла халыкым живопись, графика, этнофутуризм, геральдика дӓ вес йиш пӓшӓвлӓжӹ доно ӧрӹктӓрӓ. Дӓ вет Мари Элышты вел агыл — Земля йӹрвеш Измаилна лӹмлӹ лин шӹнзӹн. Сӹлнӹ картинвлӓжӹ эртӹш ивлӓ вашт шукы сӓндӓлӹквлӓштӹ анжыктымы линӹт. Цилӓ вӓре Измаил Ефимовын творчествым лӹмлӹ профессионалвлӓ, дӓ искусствым яратышы эдемвлӓжӓт чоте яратен вашлинӹт.

Мӓӓт ӹне тишӓк шотеш пиштӹмӹ Измаил Варсонофьевичӹн разрешеним ядын живопись пӓшӓвлӓжӹм сӓкен лыктына. Дӓ тевеш мастар авторын сынзӓ дон ужмы дӓ цаткыды кидшӹ доно мӹнерӹш ваштымы картинвлӓм - Кырык Сирнӓн цеверӹм, халыкнан сусу ӓль ойхы ӹлӹмӓшӹм дӓ философи йиш ужмашвлӓжӹм пӹтӓри анжыктенӓ.
Тӹшток рушла сирӹмӹ искусствоведени доктор В.Г.Кудрявцевын статьям анжыктенӓ — тӹ профессионал Измаилын творчествы гишӓн когонок яжон пӓлдӹртен сирӓ.

пятница, 28 февраля 2020 г.

АРДЕ

Ондрин Валька, Йынгы-Кушыргы

Арда, марлажы - Церкӹсола, тӹшкӹ Йошкар-Ола гӹц иктӓ 80 уштыш Козьмодемьянскыш кемӹ корны доно кыдалмыла. Тене тел молнамшы телвлӓ гань агыл, пиш шокшы тел лин. Теве игечӹ изиш ӱкшемден колта, лым лымындалеш, а вара тидӹм иргодеш толын шагалшы шокшы кечӹ шылатен шуа. Вара йыдым эче когон агыл ӱкшемден шӹндӓ, эче изиш лым валалалеш дӓ вес кечӹн угӹц вара шокшемден колта. Вот тенгелӓн игечӹ тене мадеш дӓ тидӹ кыдалмына корны вӹлнӓт каеш: вӓрӹн-вӓрӹн кӹлмен шӹцшӹ и лаштыквлӓ охыр асфальт вӹлвӓлӹмӓт вашталтен-вашталтен шуэн, шайыкыла эртӓт. Тенге мӹнь ӹшке "Ниссан" машинӓэм виктӓрен, Арде солашкы кыдалам. Такшым мӹньӹм Мары книгӓ издательство дӓ "У сем" журналышты пӓшӓм ӹштӹшӹ эдемвлӓ сагашты Килемар район мары конференциш нӓнгеӓт. Багажникӹш мары книгӓвлӓм дӓ журналвлӓм эче оптен шӹнденнӓ, нӹнӹм мӓ конференциш толшывлӓлӓн выжалаш сӧренӓ. Арде солажы ӹнде мары культуры ӹрдӹ кымдемеш шотлалтеш, шукыжок тиштӹ мары эдемвлӓ ӹлӓт, рушынвлӓ- 20%, эче икманяр сусламары улы. Ардештӹ лицӓлтмӹ амбулатори, культуры тома, школа, сельпо, почта дӓ эче детсад улы. Цилӓжы 165 томашты 400 утла эдем ӹлӓт.
Ардешты эче механизаторвлӓм тымдымы техникум улы, тӹдӹ тагынамшенок ылын, солана тракторист-комбайнёрвлӓ моло цилӓн тиштӹ тыменьӹнӹт дӓ нӹнӹ лошты ӓтям-ӓвӓмӓт ылыныт. Арде монгыр кырык сир монгыр гӹц пиш кого имӓн пушӓнгӹ шӹргӹ доно айыртемӓлтеш, ти шӹргӹштӹ хир йӓнлӹкӓт улы: ур, лый, умдыр (бобр), морен, ӹрвӹж, пирӹ; кынам-тинамжӹ мӧскӓмӓт вӓшлин шагалаш лиэш, маныт. А шардывлӓ моло шӹргӹ мыч лӱддеок каштыт, векӓт, кынамжы трӱк нӹнӹ машина корны вӹкӓт кыдал лактӹн кердӹт - тӹнӓм кӱн-гӹнят чӹнь кыдалшы машинӓшкӓт шыралтыт. Седӹндон, техень вӓрвлӓшты корны тӹреш йори перегалтӓш шӱдӹшӹ знакым шагалтат.
Кожла сир эдемвлӓ ти шӹргӹштӹ эче шукы йиш кӹцкӹ-ӹнгӹж, мудым, пӧчӹжӹм, понгым погат, нӹным коштат-санзалтат да тел гачеш качкаш перегӓт.
Теве ӹнде тенге Арде сола яктеӓт кыдал мишнӓ да корны гӹц шалахайыш сӓрналӹн, культура тома докат шона. Книга намалтышвлӓнӓм багажник гӹц лыктын, амасаш пырышна дӓ кого-кымда фойешты лин шагална. Тӹштӹ мӓмнӓм Арде сола администрацим вуйлатышы Алатайкина Надежда Ивановна да мары тыгырым чиэн шӹндӹшӹ ӹдрамашвлӓ вӓшлиэвӹ.
- Изиш вычалда, конференцинӓ эче икта пел чӓсӹшты веле тынгалеш,- нӹны маневӹ.
Мӓ книгавлӓнӓм йӓмдӹлен шӹндӹмӹ кужы стӧл вӹк лыкна да тӹшты вӓрӹн-вӓрӹн пиштышнӓ. Келесӓш келеш, кӹзӹт, молнамшы гань агыл, книгӓ издательствошты пецӓтлен лыкмы марла книгавлӓм, лапкавлӓшты ак выжалеп, лач техень погынымашвлӓш (концертвлӓш) кандат да выжалаш цацат. Мары халык ӹшке туан йӹлмӹ дон лӓкшӹ книгавлӓм когонат кӹзӹт ак лыд, лач кыды-тидыжӹ веле нӓлӹкалӓт. Тевеш, мӹньӹнӓт "Ярла чиӓ, вашталт миӓ" 3 книгӓэм йӓл лоэш канденӹт, а мӹнь ӹшкежӹ эче 2007 ин ӹшке оксаэм доно лыкмы "Икӓна Опанас" 5 книгӓм эче сагаэм нӓлынӓм. Оксала выжалаш агыл, такешок, кӱ ядеш, пуаш. Дӓ тевеш вара, токем тӧрӧк ик мары толын шагальы, шачынжы Йылйӓл ылам манеш доко, а ӹлӓ ти монгырышты.
- Маняраш? - яды , а мӹнь - Такешок, - маньым.
Автографым сирен пушым. Вара эче ик папи: - Э-э, пуай-пуай мӹлӓнемӓт Опанасетшым, мӹнь эче тагынамок газетеш сирӹмӹм лыдынам ыльы, кыце икӓнӓ Опанас вӓтӹвлӓ сага миж лӱлӓш каштын, а вара тӹ газетым кид гӹцем ыдырал нӓлевӹ, таки кӹзӹтат ам пӓлӹ, ма вара лин... - Пуэм-пуэм! Тенге вӹц книгӓге цилӓлӓн автограф доно сирен пушым. Вес книгаэмӓт кымытге выжаленӹт доко.
Конференцим Надежда Ивановна пачы, тӹдӹ эче мары халыкын Мер Канаш манмы организацин эдемжӹ ылеш. Вара Арде библиотекым вуйлатышы Елена Юрьевна Яковлева, район методистка Юлия Карловна Зурагаева, Ардинский школын завучшы Маргарита Васильевна Васильева, Ардински детсадын воспитательжы Наталья Юрьевна Иванова дӓ Йӱксӓр культуры томан директоржы Олег Семёнович Богданов сценыш кузен, попевӹ. Мажы кымылым валтыш, нӹнӹ цилӓн, ик юкын, мӓмнӓн туан мары йӹлмӹнӓ ти монгырышты пӹтӓш цаца, маныт. Марла лач когораквлӓ веле шайыштыт, молодёжь пеле-марла, пеле-рушла вактыт, а изи тетявлажӹ гӹнь совсемок марла ак мыштеп (лачокат, вара концертӹм анжыктымышты годым изивлӓ марла тамахань акцент доно веле кыды-тиды шамакым попалтен колтат доко). И гӹц иш мары йӹлмӹ ямаш цаца, ӹнде тетявлӓм марла ӓтя-ӓвӓ шӱдӹмӹ (заявлени) доно веле тымдаш лиэш. Мӹнь ти годым шӹм тырхы, ӹшке вӓр гӹцем кӹньӹлӹмӓт, шамакым ядым дӓ тенге келесӹшӹм: "Мӓжӹ ӹнде малын со шайыкыла цӓкненӓ, тенге цӓкнен-цӓкнен каремӹшкӹ урын валенӓ гӹнь? Ӓлдӓ ӹшке гишӓннӓ ӹшке шытырланен колтенӓ. Теве кӹзӹт как раз Россий Конституциш вашталмашвлӓм пыртат, ӓлдӓ тӹш техень вашталтышым пырташ ядына: " Обязательно, а не по желанию обучать детей в национальных школах." Ти шамаквлӓжӹ вет вара закон шӱлышӓн лит дӓ детский садвлаштат, школвлаштӓт мары йӹлмым тымдымы шотышты техень тӧрсӹрвлӓ ак лиэп. Ти шамаквлаэшем цилӓн икмагалеш шӹп лин колтевӹ, а вара ружге лапам шиӓш тӹнгӓлевӹ. Конференцим видӹшӹ шамаквлӓэм конференци протоколеш сиренӓ маньы.
Туан йӹлмӹм ӓвӓ шӹшер качмы годымок тыменьмылӓ ӹшкӓлӓ. Мӹнь эче тагышты-ӓнят лыдынам ыльы: курымвлӓ мыч шыпшылтшы ӓтя-тьотя тӹвӹлӓ дӓ туан йӹлмӹ трӱкӹшты кӹрӹлт кешӓшлык агыл. Эдем ӹшке техень ладакшы гӹц карангеш гӹнь, то тӹдӹн шулыкшат, ӹлӹмашӹжӓт тодылташ тӹнгӓлеш, дажы рӓк доно церлӓнен колтен кердеш. Вет эдемӹн вӹржӹн, ДНК манмыжын соикток курымвлӓ мыч тышкалтшы ӹшке программыжы улы, тӹдӹ когон келгӹн шӹнзӓ, йӹле вашталтен шуэн ат керд дӓ тӹдӹн ваштареш агыл лимӹлӓ, а мӹнгешлӓ, тӹдӹм виӓнгден веле шалгымыла. Тӹнӓм веле тӹнь цӓшет дон циц лиӓт.
Тенгелӓн шанен шӹнзӹшӹм мӹнь конференциштӹ дӓ вара тиштӹ эче Х1 мары съездӹш кешӹшлык делегатвлӓм моло айыревӹ, а конференци пӹтӹмӹк, Арде артиствлӓ мӓлӓннӓ концертӹм анжыктевӹ, мырывлам мыревӹ, куштен мыштымашыштымат изи тетявлӓ моло анжыктевӹ. Токем ик ӹдӹрӓмӓш тольы дӓ ӹшке лыдышвлӓжӹм анжыктыш: - Мӓмнӓн Евсейкин солалан тене 440 и лиэш, мӹнь тевеш тидӹн лӹмеш лыдышвлӓм сиренӓм, но сирен прамой ам мышты, седӹндон, пожалуйста тӓмдӓм тӧрлӓтӓлӓш ядам",- маньы. Арде монгыр эдемвлӓ мӹлам чоте келшӓт, нӹнӹ пуры дӓ пышкыда кымылан ылыт, седӹндон мӹнь ти стихотворенижӹм тенге тӧрлен пушым:

Шӹргымычаш ӓль Евсейкин сола,
Кӹчӓл кемӹк, моаш акат ли!
Соикток вет тишкӹ шукын толыт
Дӓ тӹньжӓт талашен тишкӹ ми!

Шӹргымычаш, шачмы вӓр солана,
Цевер-кымда кого шӹргӓн вӓр.
Кожла Сиреш тӹдӹ со алана,-
Цеверемдӓ вӓрнӓм Йӱксӹ Йӓр!

А маняры тиштӹ кушкеш понгы,
Кӹцкӹ-ӹнгӹж, пӧчӹж дӓ молат...
Толыт погаш тидӹм ӹрвезӹ-шонгы -
Нимаханьы ак кел шоколад.

Соланалан курым нӹлӹт-пелӹ,
Шукы эдем шачыныт тишӓк.
Ӹлӓш яжо тиштӹ, агыл нелӹ,
Ӓлдок линӓ курым тидын верц!

Ӓлдок мӓӓт линӓ Арде монгыр эдемвлӓ верц!

пятница, 14 февраля 2020 г.

ӒВӒМ ГИШӒН ШАЯ

Вадим Минеев, Йӓкӹныр

ӒВӒМ ГИШӒН ШАЯ.

Мӹнь анзылнем киӓ
Ӓвӓм дорцын сирмӓш
Дӓ вуйышкем миӓ
Ӓш тонышна гишӓн.

Ӓнгӹсӹр ялгорны
Лач пӧрт гӹц ӧльцӓшкӹ,
Такырта ти корным
Ӓвӓмӹн ялвлӓжӹ.

Шонгемшӹ вишнянӓ
Укшвлӓ дон окняшты
Мардежеш тӓрвӓнӓ
Цодырге стёклашты.

Мӹнь дорцем кымылым
Ӓви докы колта.
Ӓвижӹ ти юкеш
Трӱк мӹньӹм ӓштӓлтен,
Окняшкы анжалеш,
Дӓ мӹлӓм йӹрӓлтӓ.

Кого олмавувлӓ,
Чӹчӹмӹн пӓшӓжӹ,-
Лыманг шӹцшӹ вуйвлӓ
Ошемдӓт саднажым.

Ӓвӓмӹн кидвлаштӹ
пижоргы пидӓлтеш,
Кӹртни камакашты,
Пу, йылен печкӓлтеш.


ТӒНГВЛА ГИШӒН ШАЯ.

Мӹндӹркӹ мӹнь каштым,
Яжо вӓрвлӓм ужым,
Курымеш пелӓшӹм
Мӹнь мом солашток.
Солашкына тольым,
Шӹгерӹшкӹ кешӹм;
Школ годшы тӓнгемвлӓ
Вӓшлит юкдеок.
Мардеж лыпшен тольы,
Укшвлажӹм ӓйӓлтӹш...
Сӹнзӓ гӹцем лыкты
Санзалан вӹдым.
Мӹнь рвезӹвлӓ лошты
Лач шалгем ӹшкетем,
Изи веремӓшты
Кыш кешдӓ цилӓн?
Гранитный плитӓ гӹц,
Хресӓнь хрестӹвлӓ гӹц
Тӓ анжедӓ вӹкем
Пытькалтыдеок.
Мам вӓл попынедӓ
Йӹрӓлтен тӹрвӹ дон:
"Ӹлемӓ вӓрешнӓ,-
Корнешетшӹ - цӓш!.."
Мардеж лыпшен тольы,-
Кек юк дон чонгештӹш.
Мӹнь кешӹм паштекшӹ
Согоньдам шокташ.

понедельник, 13 января 2020 г.

ТУАН, ЛИШӸЛ ДӒ ШЕРГӸ

Елизавета Егоркина (Тихонькина), Йынгы-Кушыргы

Новелла

Мӹнь токет толынам, шергӓкӓнем дӓ туанем! Выченӓт ма мӹньӹм? Выченӓт, сӓй. Вет мӹнят тӹлӓнет шергӹ лишӓшлык ылам. Малын? Улы шӱмем вашт тӹньӹм яратем дӓ… Но теве кӹзӹтшӹ тӹньӹм ужылдалаш веле толынам. Шӹренок сагаэт лиӓш йӧн уке, ӹшкӓлӓ. Эх, тӹньӹм шуэн коден, ӧрдӹжӹшкӹ кен колташ пуйырен гӹнь, мам ӹштет?
А йӓнгем тӹнь верцет соок сылыклана, омынешӓт шӹренок каят: техеньӹ лишӹл, пуры, шергӹ дӓ цевер. Теве, мӹнь тагачы токет толынам. Сусу пар доно кидвлӓэм ваштарешет кок векӹлӓ шӓрӓлтен виктӓлтем. Тидӹлӓнжӹ сусу ылат ма? Эх, малын тидӹжӹм ядыштам? Шижӓмӹш, тӹр гачок ӹвӹртӹшӹ ылат. Теве кыце шӹмӓн шӹргӹвӹлӹшем ниӓлтӹшӹц. Тидӹ, шачмы велем, ливӹ мардежет доно мӹньӹм семӓлет. А кӱшӹц, пушӓнгӹвлӓ логӹц, йӹрен анжышы кечетшӹ сӹнзӓм йыли-йоли йӹмӹктӓрӓ, вуйта вӹкем ма-шон цӹреӓн цӹлзӹлвлӓм шӓвӓ.
Пӧртгутанышты таманяр и доно шалгышы куги, вуйта мӹньӹм пӓлен, укшвлӓжӹм шӹмӓн токемлӓ ӹрзӓл виктӓлтӹш. Тӹмӹкӹ шиждеок тетя жепӹш пӧртӹлтӹш… Эх, лачокат, маханьы ыльы ти куги лӹвӓлнӹ «тӹргӹмӹ циклӓ» дӓ «акулила» мадмы жеп! Тӹнӓмжӹ, яратымы кугиэм, тӹнят эче сӓмӹрӹк линӓт, ик вецӹн дӓ вес вецӹн мадын-ваштыл пуал мишӹ мардежеш выжгышы ӹлӹштӓшвлӓэт доно веселӓн шужгенӓт. Тӹнӓмшӹ семӹньок пӹлӹшешем вуйта ӓвӓмӹн юкшы шактыш: «Ӹдӹрем, изи пӹрцӹкем, ситӓ ӧлицӓштӹ мадын кыргыжталаш, вады качкышым ӹштӓш жеп». Тӹдет, лишкем миэн, вуем гӹцӹн шӹмӓн ниӓлтӓльӹ дӓ пӓшӓэш каштыргышы, но тӹнӓмок сек пышкыды ылшы кидшӹ доно мӹньӹн изи кизӓэм кычыш дӓ токынала сусун видӓлтӹш. Эх, кышакен кодын ти жеп?! Мондалтдымы тетя жеп!
Ма-шон гишӓнӓт шанен шалгымы годым кугин ӹлӹштӓшвлӓжӹ лошты изи кекӹн «фью-фью-фью-ля-ля-ля-ди-ди-ди-ви-чум» шактыш. Изишеш шӹп лимӹжӹ паштек, тӹдеток пакыла мыралтыш: «пиньк- пиньк, рю-рю-рю!» Семжӹм вет кыце толькы ак сӓркедӹл! Сек пӹтӓри мырымыжы шӹжвӹкӹнлӓок чучын колтыш. Но уке, тидӹ шӹжвӹк агыл: кӓнгӹж ӹрдӹн тӹдӹ ак мыры, ӹшкӓлӓ. Юкшы гӹц ӹнде пӓлӹшӹм: тидӹ – пембӹ. Тагышты, ӹлӹштӓшвлӓ лошты, ылшы кекӹн веселӓ мырыжым тӹлнен дӓ сусун колыштым. Кыце вара тидӹлӓнжӹ ат ӹвӹртӹ?! Такшым, пембӹн юкшы кӹзӹт ӹлӹмӹ вӓрӹштемӓт колалтеш. Но вет кӹзӹт сакой семӹнь шишкалтен юкым лыкшы кекетшӹ – шачмы вӓремӹн изи мырызыжы. Сӹлнӹ юкшы доно мӹньӹн туан солаэмӹм сӹлнештӓрӓ. Ах, пембӹ, ӹшкӹметӹм кайзыктемӓ, йӓ? Уке, ат кай ӹшкӓлӓ, а юкетшӹ, лачокат, шӱмӹм пишок ӹвӹртӓрӓ, тидӹлӓнжӹ тӹлӓнет келесен мыштыдымы кого тау.
Анжалтышем сола мычкы виктӓлтӹмӹкӹ, ялем ӹшкеок ӱлӹкӹлӓ, йӓр докыла, тӓрвӓнӹш. А тӹдетшӹ пацынет ши селмӓлӓ веле каеш. Лишкӹ мимӹкӹ, изи мардежеш коэштӓлтшӹ вӹд вӹлнӹ маняр шукы комбы дӓ лыды сӹнзӓшкем тӹкнӹш! Но тиштӹ тетявлӓн нӱштӹлмӹм моло ат уж. Малын нӹнӹлӓн лыды дӓ комбывлӓ сага вӹдӹм шӓвӹктӹлӓш? Вет мӹндӹрнок агыл, ӹшке семӹньжӹ ӓйӹнӹл-ӓйӹнӹл, Йынгы ӓнгӹр йоген эртӓ. Шачмы велӹштӹ лимӹкӹ, тӹдӹ лишкӹ миӓлӓлде цӹтет гыце?! Эх, тевеш, тӹдӹ вецӹн тетявлӓн тянгыра юкышты кыце йонгалтеш!
Мӹнь Йынгы тӹрӹштӓт лим. Анжемӓ, мӓмнӓн шукы и перви нӱштӹлмӹ вӓрӹшток кӹзӹтшӹ ӹдӹр-ӹрвезӹвлӓӓт сусун ит, вӹдӹм иктӹ-весӹштӹ вӹкӹ шӓвӹкӓлен мадыт. Мӹньӹнӓт нӹнӹн вӓрӹштӹ лимем шо. Но мам ӹштет, тетя жеп шукердок шайылан киэн кодын. Тенге гӹнят, ялеш чимӹ хӓдӹрвлӓэм кыдашын, нӱштӹлшӹвлӓ гӹц изиш палнырак вӓрлӓнӹшӹ тыгыды кӱэрӓн вӹдӹш цӓрӓяла пырыде шӹм цӹтӹ. Тидӹ ма тенге, ял тервенем тӹкнен, тӹдӹм ниӓлтен кеш?! Пындӹрвӹ гыце? Ӓль вес изи кол? А вӹдшӹ кӱэр вӹлецӹнет шилӓ йӹлгӹж йога. Кымык лин, кид ыреш тӹдӹм нӓльӹм дӓ шӹргӹвӹлӹшем нӧртӓлӓльӹм, вара вуйышкемӓт оптальым, эчежӹ выргемемӓт нӧртӓш шӹм ӧр. Тӹмӹкӹ мӹньӹн кӓпемӹм вуйта тамаханьы йозы ви ӓвӓлтӹш. Ынгылем: тидӹ туан шачмы велӹштем курымвлӓ мычкы тьырген йогышы Йынгы ӓнгӹрӹн ши вӹдшӹ техень кымылым ӹлӹжтӹш.
Ӹнде анжалтышем лишнок ылшы алык векӹлӓ сӓрӓльӹм дӓ, ялеш чимӹ хӓдырвлӓэм кок кидӹш кычен, изи семӹнь цӓрӓялаок, тӹшкӹлӓ тӓрвӓнӹшӹм. Кечет кӱшнӹ хозаланаат, лыпш моло уже кошкен. А ыжар шудетшӹ лошты махань йиш пеледӹш ак кай! Нӹнет эчеӓт яргатаракын дӓ сӹлнӹрӓкӹн кайыт. Мам вара попаш, нӹнӓт вет туан вӓрӹштем кушшы ылыт дӓ тӹдӹм олмыктарат. Такеш ма техень халык шаяат улы: «Шачмы вӓрӹштӹ пӹлгомжат кловойрак дӓ шудыжат ыжаргырак».
Эх, алык, алык! Тӹнят мӹлӓнем пишок лишӹл ылат! Кӓнгӹж йӹде ныгыды шудетӹм сола халык доно иквӓреш маняр гӓнӓ саленӓм! Техень куштылгы агыл пӓшӓ лошток сола вӓтӹвлӓ кужы мырыштым тенге мастарын йонгалтарат ыльы! Салымаш пӓшӓ вим ядеш дӓ сӓ доно риснен лыпшалмы семӹнь шӱлӹшӹм моло нӓлеш гӹнят, шӱм кӧргӹ гӹц лӓкшӹ мыры виклӓн мӹндӹркӹ рӹшкӓлтӓшӹжӹ цӓрӓкӓм ӹштӹде. Мане, тӹнӓмшӹ колхозна виӓнгӹн, лӹмлештӓлтӹн. Тидӹжӹм ӹштӓш пӓшӓ мастар халыкшы йӧнӹм ӹштен. А кӹзӹт, теве, цевер пеледӹш ярышан шудыжат эче салыдымы шалга. Мам вара попаш: колхоз шӓлӓнӹмӹ паштек хоза кид уке доно иктӹ ли. Яра эче варажы фермервлӓ мӱлӓндӹ пӓшӓм ӹшке кидӹшкӹштӹ нӓлӹкӓлӓш тӹнгӓлевӹ. Эчежӹ сола халыкланат кырал-ӱдӹмӹ мӱлӓндӹ пай доно шеледӓлтӹ. Нӹнетшӹ ӹшке ӓнгӓвлӓштӹштӹ самлан кушкаш волям ак пуэп, роколма, кавшта, морко дӓ молы кавштавичӹ хӓдӹрвлӓмӓт шӹндӓт.
Алыкышты кушшы пеледӹшвлӓ гӹц ӓршӓшӹм погымем лошты мӹндӹрнӹ агыл трактор юк шактыш.
– Э-э, «кӹртни ожет» шудым салаш талаша, векӓт,– шаналтышым ӹшкедурешем дӓ куштылгынрак шӱлӓлтӹшӹм.– Тенгежӹ, шуды салыде ак код, яра-хоть ти алыкынат ӹшке хозажы улы.
Пеледӹш ӓршӓшем нер докылаэм кандымыкы, вуйым сӓртӹшӹ тотлы пышым шижӹм. А ӓршӓшемжӹ, лачокшымат, тӹргачок цевер дӓ яргата! Тӹдӹ якшаргын, сарын, ошын дӓ кловойын веле каеш. Шачмы вӓрӹштем кушшы пеледӹш ӓршӓшемӹм онг сагаэм шӹмӓн, перегӓл пӹзӹрӓлӹн, туан солаэм векӹлӓ тӓрвӓнӹшӹм. Йынгы гач ванжен, неркӓшкӹлӓ кузымыкы, сӹнзӓшкем тошты сасна ферма тӹкнӹш. Попашат, уке, тӹдӹ колхозна виӓнгмӹ жепӹн пишок лӹмлештӓлтӹн дӓ пай лӓктӹшӹмӓт шукы пуэн шалген. Тенгелӓнлӓ мам-шон шанен ашкедмӹ лошты тагышты мӹндӹрнӹ валгынзыш валгалтмы дӓ хӹдӹртӹш хӹдӹртӹмӹ юк шактыш.
– Э-э, юр толнежӹ, виднӹ,– шаналтышым дӓ мӹндӹрнок агыл ыжар пушӓнгӹвлӓ лошты пӹрдӓлтшӹ туан солаэм векӹлӓ тӓрвӓнӹшӹм. Тидӹн годым шалахай вел нырышты сӹнзӓэшем кавшта ныр тӹкнӹш. Кечет шим пӹлвлӓ лоэш шӹлӹн гӹнят, кавшатвуйвлӓэт, анжалтышым сусуэмден, пиш цеверӹн, ошика-ыжаргын, кайыт.
– Рок кукшы, а толшашлык юр цецаш нӹнӹм «цӹвӹлтӓ», йӹрӹштӹ ылшы рокым нӧртӓ дӓ пакыла кушкашышты йӧнӹм ӹштӓ,– шаналтышым ӹшкедурешем.– Тенгежӹ, ти кавшта ныр хозам сусуэмдӓ. А вот шуды алыкын хозажы шотышты техеньӹм, векӓт, келесӓш ак ли.
Тенге шанымы лошты Йынгы вес сирӹштӹ пӓшӓлӹшӹ трактор векӹлӓ анжальым. Каеш: тӹдӹ шудым уже пӱлӓ кымдыкышты сален шоктен. Но кӹзӹт тракторынат юкшы шӹплӓнӹш.
Солаэм вуйыш миэн шомы лошты, юр ведӹрӓ гӹц опталмылаок ложгаш тӹнгӓльӹ. Но мӹнь тӹдӹн гӹц моло шӹлӓш шӹм цацы.
– Нӧртӓ гӹнь, нӧртӹжӹ,– маньым.
Олен сола мычкы кузем. А вуем ик векӹ дӓ вес векӹлӓ сӓркедӹлӓм. Пӧрт левӓшвлӓ гӹц йогышы юр вӹдӹм анжен, вычыдымын йӓнгем сылыкангы:
– Эх, солаэмжӹ вуйта сӹнзӓвӹдӹм йоктараш!
Солашты маняры охыр пӧрт йӓрӓ шӹнзӓ. Нӹнет изин-олен шалдыргат, яхнат дӓ чиӓлтен, олмыктарен шӹндӹмӹ пӧртвлӓ лоштет паснаок айыртемӓлтӹт. А малын ти пӧртвлӓжӹ ӹлӹшӹвлӓ гӹц пасна кодыныт? Мам ӹштет, курымжым ӹлен эртӓрӹмӹкӹ, эдем ти ӹлӹмӓш гӹц кеӓ, а сӓмӹрӹквлӓ ӧрдӹж велӹштӹ «пӹжӓшӹм опташ» цацат. Пӓшӓ вӓр моло ситӓлык лимӹкӹ, техень картин ак ли ыльы, сӓй. Но ӹнде, молнамшы семӹнь, колхозат уке, фермӹвлӓнӓт тошты суртвлӓштӹ охыр шалгат.
Тенге шанен ашкедмӹ лошты туан пӧрт яктеӓт шом. Капкам пачын пырымыкем, ӹзӓмӹн юкшым кольым:
– Ма, шыжарем, сылыканла каят?
Мӹньӹм ма тыргыжландарымы гишӓн шижтӓрӹмӹкем, тӹдӹ, ик кидшӹм пулышышкем шӹмӓн пиштен, маньы:
– Ӹлӹмӓш техеньӹ гӹньӹ, мам ӹштет? Ӹшкеӓт пӓлет, иктӹ ӹлӹмӓш гӹц кеӓ, весӹ туан велжӹм пӓшӓ вӓр кӹчӓлмӹ вир доно шуэн кода, кымшы марлан моло вес велӹш вӹсӓлтеш. Тевеш, тӹньӹмӓт пелӓшет ӹшке сагажы нӓнгеен…
Шаяжым кашартымыжы лошты ӹзам кидшӹ доно шаягаремжӹм ыдыральы дӓ куды докыла тӓрвӓнӹш. Амасам пачмыжы годым эчеӓт юкшы шактыш:
– Тол, лишем тишкӹлӓ, шыжарем. Пеледӹш ӓршӓшетӹм вӹдӹш шагалташ келеш, тӹте лӹвӹжгӓ.
Мӹнят паштекшӹ куды докы лишемӹм.
Теве амасаштышы ти пӓлӹквлӓм ӓшӹндӓрет? – ӹзӓм яды.
– Ӓштем,– маньым.– Кыце ам ӓшӹндӓрӹ? Теве ти пӓлӹк кым иӓшем годым шӹндӓлтӹн, тидӹ – лу иӓшӹн…
Ӹнде мӹнь амаса кӧсӓк тӹреш кӹзӹ нер доно итӹрӓн ыдыралмы пӓлӹквлӓм попен-попен тӹшлем. Нӹнӹ логӹц кыды-тидӹжӹ прамой акат каеп ганьок. Мам вара ӹштет? Вет ти пӓлӹквлӓм ӹштӹмӹ годшен ӹнде пӱлӓ жеп эртен кеен. Пишок шукы жеп…
Кечӹ яргата ялвлӓжӹм угӹц кымдыкеш шӓрӹш. Юр паштек ӧлицӓшкӹ мадаш лӓкшӹ тетявлӓн тянгыра юквлӓштӹ йонгалтевӹ. Тидӹн лошток тӹшецӹнлӓ «тук-тук» шактыш.
– Шиштӹ тенге шолтка ма? – шаналтышым ӹшкедурешем дӓ, ӧлицӓшкӹ лӓктӹн, шонгы куги сага шагальым.
Э-э, шиштӹ агыл ылын. Тидӹ изи ӹрвезӓшвлӓ тамахань мадыш пӧртӹм ханга лаштыквлӓ гӹц чангат. Ик ӹрвезӹн кидӹштӹжӹ молот мадеш веле. Попымы юкыштат токем раскыдын шакта. Молот кидӓн ӹрвезеток тӓнгвлӓлӓнжӹ тенге маньы:
– Мӹнь, кушмыкем, пӓледӓ, кӱ линем?
– Кӱ? – яды вес ӹрвезӹ.
– Чангышы!
– Мам чангашыжы тӹнгӓлӓт?– яды кымшы тетя.
– Кыце мам? Тевеш, кыды-тидӹ шонгы дӓ ӹшкет ӹлӹшӹ эдемӹн пӧртӹштӓт тӹрӹнялтӓш тӹнгӓлӹн, тоштемӹн. Мӹнь нӹнӹлӓн ум чангаш палшем ӓль олмыктарен дӓ тӧрлӓтен пуэм.
Изи ӹрвезӹвлӓн шаяшты мӹньӹн йӓнгемӓт ӹвӹртӓрӹш.
– Теве нӹнӹ, солан анзыкылашывлӓжӹ, ылыт,– маньым ӹшкедурешем.– Но нӹнӹн кушкын шомешкӹштӹ, ӹлӹмӓшӹжӹ веле яжо велӹшкӹлӓ вашталтшы ыльы! Тек нӹнӹлӓн пӓшӓ вӓр мӹндӹр ӧрдӹж велӹштӹ веле агыл, а шачмы вӓрӹшток лӓктеш. Тенгелӓнлӓ солаат анзыкыла ӹлӓш, цеверемӓш дӓ олмыдалташ тӹнгӓлеш.
Тидӹн лошты яргата кечӹ, ялвлӓжӹм куги ӹлӹштӓшвлӓ вашт колтен, сӹнзӓэм йӹмӹктӓрен семӓлӹш, а пӹлӹшешем туан велӹштем чонгештӹлшӹ изи кекетӹн – пембӹн – сӹлнӹ юкшы эчеӓт шактыш. Тӹдӹн мырымыжым улы кымыл доно шӹпок колышт шалгышым…

Тишец нӓлмӹ - https://tsikma.wordpress.com/2014/10/23/%d1%82%d1%83%d0%b0%d0%bd-%d0%bb%d0%b8%d1%88%d3%b9%d0%bb-%d0%b4%d3%93-%d1%88%d0%b5%d1%80%d0%b3%d3%b9/
Posted on 23 октября, 2014by tsikma

суббота, 11 января 2020 г.

МӒ ДОННААТ У КӸЦКӸВЛӒ КУШКЫН АК КЕРДЕП МА?

Валери Аликовлан 60 и темеш...
Сӓмӹрӹк жепӹнок Валеринӓ туан солажы гӹц лӓктӹн мындӹр сӓндӓлӹкӹш кеш гӹнят яргата ӹлӹмӓшжӹ дӓ сӹлнӹшаяжы яратым Кырык Сирӹштӹжок курым пӹтӹмеш эртыш...
Талантан сирӹзӹ, Микор Валери (ти псевдонимым шӹренок кычылтын) туан кырык марын литература дон поэзи верц остатка шӱлӓлтӹш якте кӹредӓлӹн.
Шанымашвлӓжӹм яжоракын пӓлдӹртӓш манын тевеш техень философи укшым ӹлӹжтӓш тӹнгӓлӹн...
Лыддок дӓ ӓлдок иквӓреш Валерин тумайымашжым авартенӓ дӓ анзыкыла виӓнгденӓ.

ЕВГЕНИЯ САВЕЛЬЕВА

Евгения Савельева, Цикмӓ

ШӸЖӸ
Ӹлӹштӓшвлӓ гӹц ыргым выргемӹм
чиэн лӓктеш йӓл анзыкы шӹжӹ,
косирӓен анжалеш тӹгӹрӹш
дӓ магӹрӓш тӹнгӓлеш шӹдӹн.
Толеш тел, ямеш ныр пуалтемеш,
ат мо корным дӓ ямат мӹндӹрӓн,
ах, маханьы жеп ӹнде толын:
мӓ ана керд тӹ лымым коэн.

ӰЭЛӒН ОДА
Ӱэн шанымашвлӓжӹ укшвлӓжӹ ганьы кӱшнӹ,
нӹнӹм ынгылаш мӓлӓннӓ, эдемвлӓлӓн, нелӹ.
Уэн ӹлӹштӓшӹжӹ — кужы йӹлгӹжшӹ ӱпшӹ,
ӱэн кымылжы — ӹдӹрӓмӓшӹн кымыл,
ышыжы – пӱэргӹн, пу эргӹн.
Важшы келгӹ.
-Ӱэм шӹндӓш келеш,
каремвлӓнӓм перегӓш,
ӹнжӹштӹ уреп –
первиок тьотивлӓнӓ тенге попенӹт.
Тӹдӹн важшы куштылгын рок кӧргӹш пыра,
ӹлӹштӓшӹжӹ пӹсӹн лӓктеш,
эдемвлӓм перегӹшӹ амаш лиэш.
Ӱэ – рокыш шагалтымы проста мӓнгӹ агыл.
Тӹдӹ пачылтеш мӹлӓнем Йымы ганьы.
Лӹвӓкӹжӹ тол дӓ амалал кӹжгӹ, рӹпшӹшӹ укшвлӓ лӹвӓлнӹ.
Ӱэ ум канден кердеш тӹлӓнет,
кыдым кӹшӓнӹшкет пиштӓш ак ли,
йӓнгешет вазеш, вуетӹм ладнангдара.
Тӹлӓнет ӱэ тӹнӓм ӹшке ши корныжым пачеш.
Тӹдӹ мычкы тӹньӹ анзыкыла ашкед!

ВӸДСӸНЗӒ
Первишӹ вӹдсӹнзӓн келгӹцшӹм пӓлен нӓлӓш нелӹ.
Ире, итӹрӓн чангымы ӱштӹ вӹдӹн ӹлемжӹ,
кышкы йыдым шӹдӹрвлӓ вилӹт,
мӹндӹркӹ, рок коргӹшкӹ вала.
Ӓнят, мӱлӓндӹн сӹнзӓжӹ дӓ йӓнгжӹ тӹдӹ ылеш,
дӓ, ӓнят, мӹньӹн изи йӓнгемӓт тӹшецӹн каштал лыкмы.

ВАШТАР ӸЛӸШТӒШВЛӒ
Ваштар ӹлӹштӓшвлӓ, шӹжӹшӹ амашвлӓ,
Шардывлӓн шурвлӓ дӓ урвлӓн пачвлӓ,
ял лӹвӓлнӹнӓ, ваштар лӹвӓлнӹ
шергӓкӓн кладвлӓлӓ киӓт.
Хозажы талашен пӧртшӹ гӹц лӓктӹ,
мӓмнӓн киднӓ гӹц ти кого пайдам
вуйта ӓрӓлтен нӓльӹ:
«Тӓмдӓн агыл, тидӹ мӹньӹн», — манын, йӹрӓлтальӹ
изивлалӓн, кыдывлӓ масакланымым ынгылаш
эче тымень шоделыт,
мӓлӓнна, трӱкок кого пайданам
ямден шагалтышывлӓлӓн.

ПУШӒНГӸН ӸДӸРЖӸ ЛИНЕМ
Мӹлӓнем техеньӹ ыш келеш,
маханьы доно шӹргӹ курымвлӓм мӱлӓндӹм переген.
Пушӓнгӹн ӹдӹржӹ линем, маньым,
кынам тӹтӹрӓ ганьы юр олен тупышкына вилӹ.
Кӧргӹ виштӹм укшвлӓштӹ дӓ ош шӹл-каргыжышты гач
виктӓлтевӹ кугивлӓ,
пачевӹ амасам, семӓлен, ӹшке кугижӓншӹшкӹштӹ,
Тигӹтпеледӹш мӱлӓндӹн вӹржӹ дон вӹршӓрем темӹш.
Тошты ӹлемвлӓ гӹц юквлӓ йӓнгӹшкем вазевы,
вуйта тӹгӹрӹш вазалты курымвлӓ гач анзыкыла ванжышы тӧр.

ЛЫМЫН ШӰЛӸШӸЖӸ
Лымын шӱлӹшӹжӹм
шотлы, ынгылы:
телӹн талашышы мижгемжӹм,
охоницӓлӓ ял лӹвӓлнӹшӹ кӹршӹ тӹржӹм,
сотым, тагачеш йӓнгетӹн шокшыла кӱслӹмӹм,
погы кормыжыш,
нылы ти телӹн хрустальжым,
пӱм тӹнгӹртен,
остаткаэш ӹштӹл, иреэмдӹ кечӹн пӹлгомеш вазалтшы
вадешшӹ тӹгӹржӹм.

ӸЛӸШТӒШВЛӒН ПӦРТЕМӸШТӸ
Ӹлӹштӓшвлӓн пӧртемӹштӹ
пӓлӹдӹмӹ корны доно эртӹшӹ,
йӓнгӹм тырыжшы дӓ тоштым цӓктӓрӹшӹ жеп.
Той ӹлӹштӓшвлӓ тӹрлецвлӓ доно корнывлӓм коэвӹ,
а мындыравлӓм мардежвлӓ шӹлтевӹ мӹндӹрк.
Кышкы ашкедшӹнан ялжы тагачы сӓрналеш,
кышкы пӹтӹрнӓлт нӓнгеӓ шӹжӹшӹ жеп?
Вес ылымӓшӹш тӹнят ӹлӹштӓшлӓ ашкылтет,
корны ажедшӹм турешет ат ли гӹнят.

Тишец нӓлмӹ - https://tsikma.wordpress.com/2010/10/17/%d0%b5%d0%b2%d0%b3%d0%b5%d0%bd%d0%b8%d1%8f-%d1%81%d0%b0%d0%b2%d0%b5%d0%bb%d1%8c%d0%b5%d0%b2%d0%b0/