Вадим Минеев, Йӓкӹныр
ӒВӒМ ГИШӒН ШАЯ.
Мӹнь анзылнем киӓ
Ӓвӓм дорцын сирмӓш
Дӓ вуйышкем миӓ
Ӓш тонышна гишӓн.
Ӓнгӹсӹр ялгорны
Лач пӧрт гӹц ӧльцӓшкӹ,
Такырта ти корным
Ӓвӓмӹн ялвлӓжӹ.
Шонгемшӹ вишнянӓ
Укшвлӓ дон окняшты
Мардежеш тӓрвӓнӓ
Цодырге стёклашты.
Мӹнь дорцем кымылым
Ӓви докы колта.
Ӓвижӹ ти юкеш
Трӱк мӹньӹм ӓштӓлтен,
Окняшкы анжалеш,
Дӓ мӹлӓм йӹрӓлтӓ.
Кого олмавувлӓ,
Чӹчӹмӹн пӓшӓжӹ,-
Лыманг шӹцшӹ вуйвлӓ
Ошемдӓт саднажым.
Ӓвӓмӹн кидвлаштӹ
пижоргы пидӓлтеш,
Кӹртни камакашты,
Пу, йылен печкӓлтеш.
ТӒНГВЛА ГИШӒН ШАЯ.
Мӹндӹркӹ мӹнь каштым,
Яжо вӓрвлӓм ужым,
Курымеш пелӓшӹм
Мӹнь мом солашток.
Солашкына тольым,
Шӹгерӹшкӹ кешӹм;
Школ годшы тӓнгемвлӓ
Вӓшлит юкдеок.
Мардеж лыпшен тольы,
Укшвлажӹм ӓйӓлтӹш...
Сӹнзӓ гӹцем лыкты
Санзалан вӹдым.
Мӹнь рвезӹвлӓ лошты
Лач шалгем ӹшкетем,
Изи веремӓшты
Кыш кешдӓ цилӓн?
Гранитный плитӓ гӹц,
Хресӓнь хрестӹвлӓ гӹц
Тӓ анжедӓ вӹкем
Пытькалтыдеок.
Мам вӓл попынедӓ
Йӹрӓлтен тӹрвӹ дон:
"Ӹлемӓ вӓрешнӓ,-
Корнешетшӹ - цӓш!.."
Мардеж лыпшен тольы,-
Кек юк дон чонгештӹш.
Мӹнь кешӹм паштекшӹ
Согоньдам шокташ.
Ӓвӓм гишӓн шая...Мане, кӱ ӓвӓжӹ гишӓн ак шаны - цилӓнок шанат. Ӓштем, салтак годым постышты шалгет- ӱштӹ, мардежӓн. Эх, шанет ӓвӓмӹн кӹртни камакажы сага тенге пӹзӹрген шӹцшӓш.Анжышаш, кыце ӓвиэт пижоргым пидеш дӓ сек яратымы эргӹжӹлӓн пуры шамаквлӓм попа. Тӓнгвлӓ гишӓн лыдышыжат ӹлӹмаш гӹц ылеш, пиш келгӹн йӓнгӹм тарвӓтӓ.
ОтветитьУдалитьО! Кӹзӹт веле ужын колтышым. Махань яжо корнывлӓ! Кӱ вара техеньӹ - Вадим Минеев? "Тӓнгвлӓ гишӓн шая" - тенге сирӹмӹм эче ужделам ыльы. "...Гранитный плитӓ гӹц, Хресӓнь хрестӹвлӓ гӹц Тӓ анжедӓ вӹкем Пытькалтыдеок..." Ай-яй, махань шамаквлӓм момы.Мӹнят икӓна тенге шӹгерлӓштӹ тангвлӓэм анжен каштым, лачок-лачок тенгеок.
Удалить