Пал Генай, Йынгы-Кушыргы
Ӓштем-ӓштем тӓмдӓм, шонгы кушыргы тӓнгвлӓэм!
Ӹндежӹ шукынжок колендӓ, но мӹньӹм колында/колыда — тенге шанем...
Ӧрдӹж эдемлӓн пӓлдӹртендӓ вуйта со руш кугижӓ верц ылында/ылыда...
Но вадын-йыдын картла мадаш погынедӓ ыльы, подылыдаат да ӹшке лоштыдажы "мӧсквӓвлӓм" со вырсендӓ. Эртӹш «сытона-сталин-жепӹм» тӹнӓм, 1960-шы ивлӓ лошты, цилӓн вет ӓшӹндӓренӹт, пиш ойхыренӹт, шудалыныт-мӓгыренӹт…
ӸНДЕЖӸ ТИ СЫТОНА ЖЕП МӸНГЕШ ТОЛЬЫШ!!!
Кыце тырхаш лиэш!
Урмыжынок мӓгрӹшӹм «24-февральын», кынам «путлер-сытонавлӓ» бомбы-ракетвлӓм кӹшкен Украиным пушташ тӹнгальевӹ.
Йаратымы вӓтем, Варяэм, йыдым-кечӹнь мӓгӹрен — вет ӹшкежӓт Украинышты шачын, кушкын, тыменьӹн…
А ӓвӓжӹ немӹц-фашиствлӓ ваштареш 1945 и якте кредӓлӹн-шидӓлӹн...
А ӹндежӹ, 2022 ин руш-фашиствлӓ токыжы толыныт — пуштыт, крават, страмаят, зораят, цилӓ шолыштыт…
Эх, кыце тӓмдӓжӹм «путлервлӓ» тодыт, алталат, вырсышкы «русский-мир» верц украиным пушташ колтат…
Шыран оксам тӱлӓт, вӹрӓн оксам, - колет гӹньят семняэтлӓн пайда кодеш.
Да ти окса теве мам ӹштӓ — вӓтӹвлӓ, ӓвӓвлӓ сусунок марывлӓм-эргӹвлӓм вырсыш поктат.
«Всё равно от тебя толку нет — пьяница и лодырь!» - тенге ане?
А ыдылаш церкӹш каштыт — Йымылан тенге ӹнянӓт ма?
Вӹрӓн шыр лошты ӹлӓт…
Намысланат вӓл?
Ӓнят кыды-тидӹжӹ йыдым шижӹн мӓгӹрӓлтӓт яратым марым/эргым ӓштен?
Ӓнят мӓгрӓлтат седӹ...
Но «путинӹм» сойток айыраш кеӓт?
Кеӓт-кеӓт!
Сойток айырат!
«Рабская покорность!» - рушла гӹнь.
Но пӓледӓ ма пакылажы лиӓлтеш?
Путинӹм карангдымык цилӓн тӹдӹм тӧрӧк вырсаш тӹнгӓлӹт!
Тенгечӹ кутанжым ныленӹт — тагачы вӹкӹжок шарыт!
«Рабская покорность!» - тенге ане?
Рушэлышты тенге ылын, но тенгеок лиэш эче пакылажат ма?
Лиэш, пока «путин» лиэш — тенге вет, ане?
А сӓндалӹк вашталтмык ӓнят вес йишлӓат лиэш, ане?…
Но, рабвлӓ сӓндӓлыкӹм вашталтен ак кердеп!
Хӹть кынамжы бунтуят гӹнят, но лач Пугачёв статян веле…
Сӓндалыкӹм кузыкташ пиш нелы пӓшӓ — теори семӹнь цилӓн тидӹм паледӓ.
Пӹтариш ашкыл — кӱм президентеш айыредӓ?
Путинӹм кодедӓ гынь — рабвлӓок пакылаат линедӓ.
Тевеш тенгечат кок чӓс утла полдымактыльы — ӹнянӹшдӓ ма?
