СОЛАШТЫ ВЕЛЕ

Софроний Гайдов, Лидӹвуй

Солашты вел лывыргы йӓнгем,
Кынам попалта ӓвӓн шӱм,
Кынам садвичӹш выртеш лӓкнем,
Дӓ шыла, пӹтӓ халан сӱм.

Солашты вел ладнангеш йӓнгем,
Кынам сагаэм ласко тӓнгем,
Кынам йӹрвӓшем олма сад.
Дӓ шолеш ӹлӹмӓшӹн пад.

Солашты вел кӓнӓлтӓ йӓнгем,
Кынам цӹвӹлтӓ ирӹ лыпш.
Цевер шӹдӹрвлӓ йӹр мӹнь сӓрнем,
Дӓ чӱкта эче иктӹм ыш.

Солашты вел ӹлӹжеш йӓнгем,
Кынам ныр капка выча виш.
Кынам первишӹ эче пӓнгеш.
Дӓ ӹлӹж кеӓ мимык лиш.

Солашты вел ӹвӹртӓ йӓнгем,
Кынам ашкедӓм нырвлӓ гач.
Кынам кымылым пурым шӓнгеш,
Дӓ ӱжӹт толаш тӓнгвлӓ пац.

КЫШКЫ АНЖЕТ...

Пал Генай, Йынгы-Кушыргы

«Кышкы анжет сынзӓм карен, кышкы - чӱчӹн?» -
Шонгы тӓнгӹм ядым шужгыш тангыж гач.
- Амат пӓлӹ? Тамам ужам, тама - чучын...
Тыргыж коэм цӓртем кӧргӹш шӹлӹн лач...

Кугижӓн окняшты ужам иктӹм -
Шокшы кӓнгӹж, цевер туан вел...
Косир диктор у тыгырым виктӓ -
Чиэм, лӓктӓм... Ӧрӓм! Тӱнӹ - тел!!!

Сӹнзӓм чӱчӓм - лӱдӹктӹш тӹтӹрӓ
Кӱшӹц вала халык корны вӹк...
Кок вуйан кек вуйвлӓ кӧргӹш пыра
Шамым качкын кушкеш уждым кек...

Сола мычкы колам пӹльдӹр йукым -
«Котим каля поктылеш ирвец!»...
Саслен пыртат пӧртӹш кайдым сӱкӹм -
«Мӧскӓм шыра кӹзӹ вадывец!»

Кырык Сирӹм пӓлдӹртенӓ мырен
Айо шӓрлӓ и гӹц иш - йӹрвек...
Мары йӹлмӹм мыры кӧргӹш шырен
Сӹлнӹм пӹзӹремдӓ уждым кек...

Йыдпел шамак туан вӓрӹш пыра
Кугижӓн окняшты кок вуян кек вел
Туан окням чӱчеш чӹнь тӹтӹрӓ
Важна кошкен ак ям вӓл, шӱмбел?..

...Шонгы тӓнгем йукым лыкташ цӓрнӹш
Вуйым сӓкен тагыш пырен кеш...
Тангыж гач сӹгӹрем – «Толеш кӓнгӹж!
Ит ям – вӹдӹм кӹшкӹмлӓ йӹрвеш!!!»