Пал Генай, Йынгы-Кушыргы
...
Туан солам монден ам керд -
цецен-пичӹ, лявӹрӓн корны...
Тагыш лӓктӓт йалын ашкед -
мӓгӹрен рӹпшӓ мардеж-вӓкшет,
шылдыр шыла, кодеш тоны...
Шанавӹл Кӱ тӱлӓ пӱлӓ -
ӱжеш мӹньӹм тӹш кӹвер...
Чиӓ шӓрлӓ, пӹсмӓн шӱлӓ,
пачыт кӧргӹм шелшӹ кӱвлӓ,
лӓктеш угӹцӹн увер...
Йылыш Йынгы йоген пыра -
ош амашвлӓ алык мыч...
Шудым сален халык мыра,
ымылангын куза сыра,
толеш сӱӓн - шакта пыч...
Кырык марын ош амашвлӓ
сотым перкӓт курым гач...
Ласко халыкнан пӹжӓшвлӓ -
ушнат кӧргӹштӹ пелӓшвлӓ,
кӹлӹм кӹлдӓ анзылвач...
Шӹдӹр пачеш Шур покшалан
Комбы-корным цилӓ век...
Тетя шачеш кӱш анжалын,
ышкал ӱпшӹм кыш нылалын -
тӹшкӹ ӱжеш шӹжвӹк-кек...
...
Кырык Сирӹм нылат пӹлвлӓ -
руш сыц шыла? Пижеш вел?
Сола халык йӧртен тылвлӓм,
нелӹн колтенӹт йӹлмӹвлӓм -
кӓнгӹж жепӹн... шӓрлӓ тел...
Пирӹ урмыжеш солашты
Мӓгрӓ папи йукдеок
Ыныкажымат войнашкы
Пушташ колта самсарашкы
Шунйал мӧскӓ шамдеок...
Шалгат вӓтӹвлӓ цӹтӹрен -
ышмараж гӹц шӓпнӓ шонг...
Колтат эргӹвлӓм цымырен,
шӹдӹн тупыштым йышкырен...
...вилеш корныш кечӹдонг...
...
Ма техеньӹ токы толын?
Арен кевӹ цилӓнок?
Кок-вуй кӹшкӹм ӱжӹт молы,
кок-вуй вӓрӓш омпыш шолы -
окняш пырат яддеок...
Ӹнде шкежӓт шелӹн кешнӓ -
пеле-мары, пеле-руш...
Шӹдӹм шанен шкедурешна
шагалтеннӓ ваштарешнӓ
пуры тӓнгӹм...
ана ӱж...
...
Шатын!!!...
Шӓрлем Шанавӹлӹм
Кӱвлӓ логӹц каеш вир
Йых пашкартыш дон тӹкӹлмӹм
Лыктам шӓпнӹш кӱ гӹц кӹлӹм
Ӹнжӹ шапы Кырык Сир...
Шӓмӓн шаман Йынгы вӹднӓ
Уэмдӓрӓ Йылымат...
Кӱшкӹ сир гӹц кӓрш сем вӹсӓ...
Кырык Марын йӹлмӹ пӹсӹ
тырыж мышта сыцымат...
.......
...
.
Туан солам монден ам керд
Цецен-пичӹ, лявӹрӓн корны
Мӹнгеш толам йалын ашкед
Сусун рӹпшӓ мардеж-вӓкшет
Шылдыр каеш, кодеш тоны...
...
