КЕККОМБЫ КОРНЫ

 Геннадий Замятин, Йӱрнӹ

...тёзкалан, Геннадий Смирновлан 

 

Векат Америкыштыш йыдвлӓ

Пӹцкӓтӓ ылыт, кужыраквлӓ.

Йыдымжы тама со йыштылат,

Машанет, толыт лач ямаквлӓ.

Тӹлзӹжӹ веле со техеньӹ,

Маханьы Кырык Сиржӹ кӱшнӹ.

Пац канден семжӹм, йӓнгӹм темӓ,

Туаныш, Йынгы сирӹш ӱжӹн.

Сар тӹлзӹн соты угӹц вазеш

Пумага вӹкӹ понгыжтарен.

Дӓ пижшӹ шӱм кӧргет гӹц вазет,

Мам когон тенге йылатара.

Кеккомбы корныжы мӹндӹркӹ...

Кыштакен имни кӹтӧ сӓрнен.

Ӹрвезӹ тыл сагажы ӹрен,

Дӓ ломыжым тури гӹц шарген.

Маханьы пыш роколман тотлы

Тылшол вацакыштыжы кӱшӹн!

Пиш йыла тылжы, соты-соты...

Ӓштӓлтет - вуйта нӓлеш шӱлӹш.

Татьяна Иванова, Помар сола

Маханьы сӹлнӹ ылат, шӹжӹ!
Маняры цӹре йӹрӹм-вӓш!
Ашкедӓт куштылгын, нӹжӹлгӹн,
Талашет вуйта вӓшлимӓш.

Маханьы косир, цевер сӹнет -
Нӓрӓтет улы йиш гӹц йиш.
Вет такеш агыл "шӧртньӹ" лӹмет,
Йӹлгӹжӓт тӹньӹ сӹлнӹн пиш.

Маханьы кымылетшӹ шӹмӓ:
То магӹрӓлӓт вады век,
То йӹрӓлтӓлӓт - сӹнзӓ йӹмӓ,
То кушталталын сӓрнӓл кет!

Маханьы куштылгы шӱлӓлтӓш!
Манярым нӓлӓш лиэш вим!
Кыце йонгатан йӹр рӹшкӓлтеш
Мӱландӹ мычкы шӹжӹ вик!

АХ, АРВӒТӸ ШӸЖӸ...

Геннадий Замятин, Йӱрнӹ

Косир кӱкшӹ пистӹ, 
Дӓ техеньӹ сары,

Йӹрӹм-йӹр валгалтеш

Кечӹжӹн аяреш.

Пистӹн соты тылжы

Мӹньӹмӓт ӹрӹктӓ.

Дӓ сагажы ӱжеш

Тагышкы мӹндӹркӹ.

Эчеӓт мӹлӓнем

Ласкон йӹрӓлтӓлӓт.

Улыге йӓнгемӹм

Угӹцӹн тӹнь нӓлӓт.

Юкем мӹньӹн сусун

Гармонь семеш лӓктеш.

Симсӹ пылгом якте

Кӱшкӹ-кӱш вӹсӓлтеш.

Йӓнгем, ородишкӓ,

Мажым сусуланет?

Сӧдӧемшӹ вуем

Мажым вӓл тӹнь шанет?

Ти лаштыра пистӹн

Угӹц толеш шошым.

Мӹньӹм веле выча

Палны телжӹ ошы.

Ах, арвӓтӹ шӹжӹ

Тӱнӹжӹ тагачы.

Дӓ седок йӓнгешем

Соты мыры шачеш.

 Татьяна Иванова, Помар сола

Ирӹ жерӓ алыкым шыпшалеш,

Шӧртньӹ шерлӓ вазын ире лыпш.
Мардеж ыжар шуды доно мадеш,
Шӓрлӓ йӹрӹм-вӓш пеледӹш пыш.

Шӹргӹ шайыц кечӹ олен лӓктеш,
Кӓнӹшӹ мӱлӓндӹм ниӓлтӓл.
Шӱӓлгӓлӹн ире вӹдӓн йӓреш,
Тӹгӹр вашт анжалеш йӹралтӓл.

Кеквлӓ мырат, ирӹ жерӓм мактен,
Сӹлнӹ юк рӹшкӓлтеш йӹрӹм-вӓш.
Пӹлгом, кловой сӹн доно валгалтын,
Толшаш кечӹм йӓмдӹ лиӓш вӓш.

Пишок сӹлнӹн кӓнгӹж ирок шачеш,
Ире юж дон шӱлен, ак тем шӓр.
Цӓшӓн кечӹ лиэш тек тагачы,
Пуры ирок, туан шачмы вӓр!

АЯРАН ТЕЛ

 Татьяна Иванова, Помар сола

Тӱнӹ шалга ӱштӹ тел игечӹ,

Кӱшӹц вилеш ладнан мамык пын.

Пӹлвлӓ шайыц лӓкшӹ цевер кечеш

Шӧртньӹ гань йӹлгӹжеш ире лым.

Кечӹ, мадын, сӹнзӓм йӹмӹктӓрӓ,

Онгым темӓ ӱштӹ ире юж.

Тел ӹшкӹмжӹм яжонок пӓлдӓра,

Тӹдӹн сӹлнӹ сӹнжӹм цаклы, уж!

Телжӹ, вуйта ош шылдыран йӱксӹ,

Лым пӹрцӹквлӓ вӹсӓт лӹпӹ гань.

Ак керд нӹнӹм лӱдӹктӓрен ӱштӹ,

Ак керд нӓлын кӹлмӹ нимахань.

 

Кечӹ лӓктеш телӹм шоэн вел.

Но кыцела, йӓнгӹм ладнангдарен,

Пуа ӹлӓш вим аяран тел. 

Ӓнят, шошым жепӹм ӓшӹндӓрен,

ТЫЛЫК ТОМА

Геннадий Замятин, Йӱрнӹ

Охыр тома - тылык кодын,

Тӹрӹнялтӹн ик покашкы.

Корны уке тӹшкӹ комы

Корным тӹш иктӓт ак ташкы.

Шӓлӓнӓлтшӹ камакажын

Тагынамок ӱкшен ломыж

Охыремшӹ тӹ томажы

Акат вычы хоза толмым

Луды фоткывлӓ стенӓштӹ

Пиш первишӹм трӱк ӹлӹжтӓт.

Ти стенӓвлӓ вуйта ӓштӓт

Сусу-ойхыжым тӹштӹшӹм.

Эх, веселӓ тетя юкшы

Ирок-вадеш кӧргӹм темен

Айо годым сусу шукы,

Дӓ рӹшкӓлтӹн гармонь семет.

Ирок йӹде ош камака

Ӹнде тыл дон ак ке ӹлӹж

Кен колтенӹтӹш тиш пакы

Ти томашты кӱжӹ ӹлӹш.

Пӓшӓӓт нимат ак ашны

Ӧлицӓшкӹлӓ сылыкын

Пӹц окнявлӓ веле анжат

Малын кодыныт мытыкын?

Томанат седок кынамжы

Ӹнянӓлмӹ шошым шачеш:

Толеш хоза палан ямшы,

Амасажым пурын пачеш...

АРДЕ СОЛА - ПУРЫ СОЛА

Геннадий Замятин, Йӱрнӹ

Арде сола - пуры сола,
Шӹрерӓкӹн тӹшкӹ толам
Ӹшкӹмемжӹм ладнангдараш
Йӓнгӹм чӹнь пишок карштара.

Лӓктӓм вадеш олицӓшкӹ
Йӹрӹм розвыялгы-ошы.

Тидӹ ружга шошымнажы,

Мӹлӓмӓт техеньӹ яжо!

Ӹдӹр кеӓ пиш косирӹн,

Лач лыдышым сӹлнӹм сирӓ.

Сӹнзаэмӹм ам керд тарвал,

Дӓ мӹнь шошымышты ярлем.

Мӹньӹн ивлӓ, эх маханьы!

Ӹдӹр паштек ямшы ганьы.

Ак ли гыце хытыралаш,

Лач ик выртеш шагалалаш?

Дӓ тӹнӓм цилӓ келесем.

Шылем, манам, цеверешет

Тӹньжӹ изиш вел йӹрӓлты -

Лч мырыла трӱк вӹсӓлтӓм.

...Арде сола - пуры сола

   Шӹрерӓкӹн тӹшкӹ толам

   Сек цевержӹ тӹштӹ выча

   Вадеш Йылым ванжа пышем...