ЛИЭШ ЖЕРӒ УГӸЦӸН

Ондрин Валька, йынгы-Кушыргы

Шӹре - шоэ,
Мадеш коэ.
Мадеш вӹд покшалныла.
Кечӹ олен,
Шокшым поген,
Вала ӱлӹк палныла.

Кечӹ олен,
Шокшым поген,
Вала вӹд пындашышкы.
Якшарикӓн,
Пиш кужикӓн,
Шыпшылт кеш пындашыжы.

Якшарикӓн,
Пиш кужикӓн,
Йӹлгӹжӓлтеш вӹдӹштӹ.
Анжен сылык,
Вуйта тылык,
Шалгем мӹнь вӹд тӹрӹштӹ.

Анжен сылык,
Вуйта тылык,
Ӓшӹндӓрен сотыжым.
Пиш переген,
Кычен шергӹн,
Мӹлӓм пумы шокшыжым.

Кечӹ, кечӹ -
Сотыгечӹ
Малын пӹтет выртышты?
Ох, шеклӓнем,
Пӹц мӹлӓнем
Йыдын шим йӹвӹртӹштӹ.

Ох, шеклӓнем,
Пӹц мӹлӓнем
Вӹдӹн тура сирӹштӹ.
Лиэш-агеш
Угӹц шалгаш
Тиштӹ иргод ирӹштӹ?

...Шӹре-шоэ
Мадеш коэ,
Мадеш вӹд покшалныла.
Кечӹ олен,
Шокшым поген,
Вала ӱлӹк палныла.

Жеп шылдыран,
Жеп мындыра,
Тӹдӹм кердеш кӱ кычен?
Ам ли сылык,
Ам ли тылык,
Лиэш жерӓ угӹцӹн!