КОДДЕ ТӒНГ, НИ ТӒНГӒ

Геннадий Замятин, Йӱрнӹ

Ядат кӱсӹлӓ ик цӓркӓм,

Кодде ӹнян тӓнг, ни тӓнгӓ.

Качы тек кӓп мычкет шӓрлӓ,

Лыкнет карштышым тӹнь йӓнг гӹц.

Атат пӓлӹ, кыш корнетшӹ,

Кышкы ӱжеш вӓл кек кагак?

Анжен шалгет пак ӹшкетӹн,

Сӓрӓл ат тол кеквлӓм, агыт...

Мыралталат шӹжӹ мырым

Сылыкланыш йӓнгет тӹштӹ.

Коти игӹ дон хытырет,

Нӹжгӓм выртеш трӱк ӹлӹжтен.

Сӓпӹм тагынам колталтым,

Ямын тагышты имнижӹ.

Цӓшӹмӓт тӹнь йӱнӓт шалток

Пиш яратет лач кугижӹм.

Тӹнь яратет кӓнгӹж лыпшым,

Ирок лӓкшӹ соты кечӹм.

Тек ӹлӹмӓш шӹрен лыпша,

Ач кынамжы гӹньӹ - кечӹнь.

Яджат кӱсӹлӓ ик цӓркӓм,

Тамам вуйта шайышталнет,

Ӹшке йӓнгӹм пунет шӓргӓл,

Дӓ сӹнзӓшкӹ тӧр анжалнет...

ШӰМ КОЭВЛӒ

Ондрин Валька, Йынгы-Кушыргы

Шӱм коэвлӓ,
Шӱм коэвлӓ:
То шӹревлӓ,
То шоэвлӓ;
То тӓрвӓнӓт,
Вара цӓрнӓт,
То шӓлӓнӓт,
Кымдан шӓрлӓт...

Вуйта мардеж
Виӓн каштеш-
Тангыж мадеш
Ирок-вадеш.

Лыпшат-лыпшат,
Мӹньӹм рӹпшӓт,
Вуйта палны,
Вӹд покшалны
Кӓпем иэш-
Йӓнгем шиэш...

СЕК ШЕРГӸ - ИРӸК

Геннадий Замятин, Йӱрнӹ

Паштекет хӓрдӹм пивлӓ поктат,
Вӹретӹм шижӹн, шамде оптат.
Тӹнь веле шушыргышы ылат,
Дӓ шушыредӹм, лицен, нылет.

Шынгалтат тӹньӹ лымжы вӹкӹ,
Пиш пӓлет, ат мо тӹнь ӹшӹкӹм,
Тек кодеш ӹлӓш вӓл маняры-
Ӹшкӹмӹм цӓрнӹде сотарет.

Тӹнь ат яраты викок цуцам,
Кыштакен йӹле, "кӓтӓм" ужыт,
Кыштакен, ат ли гӹньӹ ярал,
Цилӓн вӹкетшӹ вуйта арат.

Тӹнь - со ӹшкетӹн каштшы пирӹ,
Тӹлӓнет сек-сек шергӹ - ирӹк,
Лишӓшлык ылат йой дӓ патыр,
Дӓ сӹнгӓш келеш пивлӓн партьым.

Корнетшӹ веле иктӹ - анзык,
Ӹнжӹ попазы вел алтанзык
Дӓ тӹдӹ тервен трӱк цызлалташ,
Тӹнӓм тӹнь урмаш гач вӹсӓлтӓт.

Тӹ пивлӓм шайыланет коден,
Пиш ӱштӹ йыдым тӹлзӹ сотеш,
Трӱк урмыж колтет тӹнь, сӹнгӹшӹ...
Дӓ йӓнгӹш у гӹц толеш ӹшӹк.