АХ, АРВӒТӸ ШӸЖӸ...

Геннадий Замятин, Йӱрнӹ

Косир кӱкшӹ пистӹ, 
Дӓ техеньӹ сары,

Йӹрӹм-йӹр валгалтеш

Кечӹжӹн аяреш.

Пистӹн соты тылжы

Мӹньӹмӓт ӹрӹктӓ.

Дӓ сагажы ӱжеш

Тагышкы мӹндӹркӹ.

Эчеӓт мӹлӓнем

Ласкон йӹрӓлтӓлӓт.

Улыге йӓнгемӹм

Угӹцӹн тӹнь нӓлӓт.

Юкем мӹньӹн сусун

Гармонь семеш лӓктеш.

Симсӹ пылгом якте

Кӱшкӹ-кӱш вӹсӓлтеш.

Йӓнгем, ородишкӓ,

Мажым сусуланет?

Сӧдӧемшӹ вуем

Мажым вӓл тӹнь шанет?

Ти лаштыра пистӹн

Угӹц толеш шошым.

Мӹньӹм веле выча

Палны телжӹ ошы.

Ах, арвӓтӹ шӹжӹ

Тӱнӹжӹ тагачы.

Дӓ седок йӓнгешем

Соты мыры шачеш.