ЕВГЕНИЯ САВЕЛЬЕВА

Евгения Савельева, Цикмӓ

ШӸЖӸ
Ӹлӹштӓшвлӓ гӹц ыргым выргемӹм
чиэн лӓктеш йӓл анзыкы шӹжӹ,
косирӓен анжалеш тӹгӹрӹш
дӓ магӹрӓш тӹнгӓлеш шӹдӹн.
Толеш тел, ямеш ныр пуалтемеш,
ат мо корным дӓ ямат мӹндӹрӓн,
ах, маханьы жеп ӹнде толын:
мӓ ана керд тӹ лымым коэн.

ӰЭЛӒН ОДА
Ӱэн шанымашвлӓжӹ укшвлӓжӹ ганьы кӱшнӹ,
нӹнӹм ынгылаш мӓлӓннӓ, эдемвлӓлӓн, нелӹ.
Уэн ӹлӹштӓшӹжӹ — кужы йӹлгӹжшӹ ӱпшӹ,
ӱэн кымылжы — ӹдӹрӓмӓшӹн кымыл,
ышыжы – пӱэргӹн, пу эргӹн.
Важшы келгӹ.
-Ӱэм шӹндӓш келеш,
каремвлӓнӓм перегӓш,
ӹнжӹштӹ уреп –
первиок тьотивлӓнӓ тенге попенӹт.
Тӹдӹн важшы куштылгын рок кӧргӹш пыра,
ӹлӹштӓшӹжӹ пӹсӹн лӓктеш,
эдемвлӓм перегӹшӹ амаш лиэш.
Ӱэ – рокыш шагалтымы проста мӓнгӹ агыл.
Тӹдӹ пачылтеш мӹлӓнем Йымы ганьы.
Лӹвӓкӹжӹ тол дӓ амалал кӹжгӹ, рӹпшӹшӹ укшвлӓ лӹвӓлнӹ.
Ӱэ ум канден кердеш тӹлӓнет,
кыдым кӹшӓнӹшкет пиштӓш ак ли,
йӓнгешет вазеш, вуетӹм ладнангдара.
Тӹлӓнет ӱэ тӹнӓм ӹшке ши корныжым пачеш.
Тӹдӹ мычкы тӹньӹ анзыкыла ашкед!

ВӸДСӸНЗӒ
Первишӹ вӹдсӹнзӓн келгӹцшӹм пӓлен нӓлӓш нелӹ.
Ире, итӹрӓн чангымы ӱштӹ вӹдӹн ӹлемжӹ,
кышкы йыдым шӹдӹрвлӓ вилӹт,
мӹндӹркӹ, рок коргӹшкӹ вала.
Ӓнят, мӱлӓндӹн сӹнзӓжӹ дӓ йӓнгжӹ тӹдӹ ылеш,
дӓ, ӓнят, мӹньӹн изи йӓнгемӓт тӹшецӹн каштал лыкмы.

ВАШТАР ӸЛӸШТӒШВЛӒ
Ваштар ӹлӹштӓшвлӓ, шӹжӹшӹ амашвлӓ,
Шардывлӓн шурвлӓ дӓ урвлӓн пачвлӓ,
ял лӹвӓлнӹнӓ, ваштар лӹвӓлнӹ
шергӓкӓн кладвлӓлӓ киӓт.
Хозажы талашен пӧртшӹ гӹц лӓктӹ,
мӓмнӓн киднӓ гӹц ти кого пайдам
вуйта ӓрӓлтен нӓльӹ:
«Тӓмдӓн агыл, тидӹ мӹньӹн», — манын, йӹрӓлтальӹ
изивлалӓн, кыдывлӓ масакланымым ынгылаш
эче тымень шоделыт,
мӓлӓнна, трӱкок кого пайданам
ямден шагалтышывлӓлӓн.

ПУШӒНГӸН ӸДӸРЖӸ ЛИНЕМ
Мӹлӓнем техеньӹ ыш келеш,
маханьы доно шӹргӹ курымвлӓм мӱлӓндӹм переген.
Пушӓнгӹн ӹдӹржӹ линем, маньым,
кынам тӹтӹрӓ ганьы юр олен тупышкына вилӹ.
Кӧргӹ виштӹм укшвлӓштӹ дӓ ош шӹл-каргыжышты гач
виктӓлтевӹ кугивлӓ,
пачевӹ амасам, семӓлен, ӹшке кугижӓншӹшкӹштӹ,
Тигӹтпеледӹш мӱлӓндӹн вӹржӹ дон вӹршӓрем темӹш.
Тошты ӹлемвлӓ гӹц юквлӓ йӓнгӹшкем вазевы,
вуйта тӹгӹрӹш вазалты курымвлӓ гач анзыкыла ванжышы тӧр.

ЛЫМЫН ШӰЛӸШӸЖӸ
Лымын шӱлӹшӹжӹм
шотлы, ынгылы:
телӹн талашышы мижгемжӹм,
охоницӓлӓ ял лӹвӓлнӹшӹ кӹршӹ тӹржӹм,
сотым, тагачеш йӓнгетӹн шокшыла кӱслӹмӹм,
погы кормыжыш,
нылы ти телӹн хрустальжым,
пӱм тӹнгӹртен,
остаткаэш ӹштӹл, иреэмдӹ кечӹн пӹлгомеш вазалтшы
вадешшӹ тӹгӹржӹм.

ӸЛӸШТӒШВЛӒН ПӦРТЕМӸШТӸ
Ӹлӹштӓшвлӓн пӧртемӹштӹ
пӓлӹдӹмӹ корны доно эртӹшӹ,
йӓнгӹм тырыжшы дӓ тоштым цӓктӓрӹшӹ жеп.
Той ӹлӹштӓшвлӓ тӹрлецвлӓ доно корнывлӓм коэвӹ,
а мындыравлӓм мардежвлӓ шӹлтевӹ мӹндӹрк.
Кышкы ашкедшӹнан ялжы тагачы сӓрналеш,
кышкы пӹтӹрнӓлт нӓнгеӓ шӹжӹшӹ жеп?
Вес ылымӓшӹш тӹнят ӹлӹштӓшлӓ ашкылтет,
корны ажедшӹм турешет ат ли гӹнят.

Тишец нӓлмӹ - https://tsikma.wordpress.com/2010/10/17/%d0%b5%d0%b2%d0%b3%d0%b5%d0%bd%d0%b8%d1%8f-%d1%81%d0%b0%d0%b2%d0%b5%d0%bb%d1%8c%d0%b5%d0%b2%d0%b0/