ПУРЫ СӸНГӒ

Евгения Савельева, Цикмӓ

Пӹзӹлмӹшкӹ лым вазальы

Дӓ «Тотештшӓш, - маньы, - райзы».

Тотым нӓльӹ шекланӓлын.

Качы кӹцкӹ – пӓлен нӓльӹ.

- Мӱӓн кӹцкӹм - чӹнгӓт пӹсӹн,

Шужыш кек мӹнь докем вӹсӓ, -

Ынгылдарен пуш пӹзӹлмӹ, -

Телӹм кеклӓн ӹшӹк - мӹньӹ.

Ӹлӹмӓшнӓ, ӓнят, качы -

Тӹдӹ вет у корныш лӓкшӹ.

Корны такыртымы агыл,

Шачын кердеш тупынь ашкыл.

Тьотянавлӓ пыт труенӹт,

Нелӹ, ясы гач эртенӹт,

Нӹнӹн шам мӓмнӓн вӹрӹштӹ -

Лӓкненӓ мӓӓт сӹнгӹшеш.

Тек пӹзӹлмӹн укш цевергӓ,

Сарастара туан велнӓм.

Качы кӹцкӹм кекшӹ чӹнгӓ -

Качы ямеш, пуры сӹнгӓ.