ЦЕРМЫШАЛЕМ, ЦЕРМЫШАЛЕМ...

Владислав Самойлов, Цермышал

Сола вуйыштет мӹнь валем.
Ӧлицӓшкет, лач лицӓшкет,
Ӓнжал колтем - кышкы вӓшкет?

Жеп -
Окнявлӓӓн сӹнзӓштет,-
Изи годшем моло ӓштет?
Теве,
Нӱштӹлӓш сарвалем:
- Цермышалем, Цермышалем...

"Пычихалкы", пырсавичӓл,
Сӹлнӹ Шурлап, Кардывичӹ -
Кушкылдалынамат, салем:
Цермышалем, Цермышалем...

Тек романым сирен мышты,-
Пӹтӓриш лыдышем кышты?
Кырык сирем - шӱм покшалем -
Цермышалем, Цермышалем...

Яратенӹт - яратенӓм,
Штурма годым вӹсен кенӓм.
Эртен,пӹтен. Кӱм алталем -
Цермышалем, Цермышалем?

Цермышалем - шӱм вокзалем -
Сола вуйыштет мӹнь валем.
Тӹньӹм шӹрен шаныкалем -
Цермышалем, Цермышалем...

Жеп, анжалыма, чонгештӓ,
Соты ивлӓнӓм йӹргештӓ.
Цермышалем, Цермышалем -
Шачмы пӧртӹштӹ...
Хыналем.