ШӸЖӸМ УЖМАШ

Виталий Петухов

Шке цевержӹм анжен, ваштар
Тырынок амала.
А выргемжӹ, якшар лаштык,
Шоэн, ӱлӹк вала.

Тылан соты ӹлӹштӓшвлӓ
Укш гӹц ӹнде шӹлӹт.
...Анжен шалгыш ти нӓрӓштӓм,
Ӧрӹн, луды вӹлӹ.

Шӹкш дон нӓлмӹ гань сӹнзӓштӹ
Сылык лит тамалын.
Чучыт вилшӹ ӹлӹштӓшвлӓ
Шӹлшӹ ик цамала?

Ӓль ваштаржы, сӹлнӹ-кужы,
Тӹкнӹшӓт сӹнзӓэш,
Шке худажым угӹц ужын.
Ойхырен сынзалеш?

Ял лӹвӓлнӹ кишӹ ара
Ӹлӹштӓшвлӓ вӹлнӹ
Вӹцкӹж ялан, шим аржаан,
Шалга цевер вӹлӹ...

("Со пуры лижӹ" книгӓ гӹц, 70 стр.Йошкар-Ола,1990и, Мары книгӓ изд-во.).