Вячеслав Григорьев (Тотир), Паратмар
Темӹт кӓй дон алык лап дӓ вӓрш.
Сылыкланен юкым пуа кӓрш.
Шӱлӓ кӓнгӹж рвезӹ онгем вашт,
Анжа август мӹньӹн пӧрт окняш.
Кыш ашкедӓм ӓли шӹнзӓм кыш-
Цилӓ варе тотлы киндӹ пыш.
Вӹсен эртӓ мардеж нырвлӓ гач,
Тидӹ август, август эртӓ ач!
.......
"Шачмы вӓр" лыдыш-сборник гӹц,с.8, Мары книгӓ изд-во, Й-Ола,1988и.
"кай" - ти шамакжым воксьок ам палӹ... Словарьышты (Саваткова) "дай" дӓ "кажется" значенивлӓ вел улы...
ОтветитьУдалитьТи лыдышыш семӹньжӹ "пӹц" ӓль "тӹтӹрӓ" манаш лиэш векӓт.
Мам ӹне ти шамак "кай" палдӹртӓ??? Палшыдай паледӓ гӹнь...
Самынь анжыктымы, "кай" агыл- "кӓй" (отава, то есть трава, выросшая после укоса). Тидӹ ынгылыман, а вот "вӓрш" шамакым мӹнят ам пӓлӹ. То ли Паратмарвлӓн говор гӹц, тӓ- вӓрӓш кекӹм тенге кӹтӹкӹн "вӓрш" манын.Ӹнде ӹшкежӹ гӹц ядын ат керд, кым и, нӹл и(?) анзыц колен тӹ кеш.Новочебоксарышты ГЭС-ӹм строен, тӹшток ӹлен.Пиш яжо поэт.
ОтветитьУдалитьТау-тау, шотеш пиштӹмӹ Нина!
УдалитьТӧрӧк тӧрлем ӹне... А вот "вӓрш" тидӹ Саваткова семӹнь "ровное заливное место" ылеш.
ӒВӒСИРЕШ ШАЧЫН
ОтветитьУдалитьӒвӓсиреш шачын кырык мары халык,
Тошты годшы родын ылеш мӓмнӓн вӹр.
Пуры шӱмӹм пачын, Йыл тӹр патыр мары
Ирӹк верцӹн шалген, ӱжӹн йӓлӹм йӹр.
Первиш роды важшы шӓрлен шукы вӓрыш,
Карпат кырык докы, мӹндӹр Восток лиш.
Той пыч юкшы ванжыш вӹдӹн кымда шӓрӹм,
Кырык сирӹш тӓнгвлӓ, корны пачмы виш.
Хоть портретшӹ уке Богатырь Акпарсын,
Ӓшешнӓжӹ кодеш лӹмжӹ соэшок.
Сары виӓш ӱпшӹ вуйта кӹляш парсын,
Выльныжалтын каеш ивлӓ логӹцок.
Шукы Йылна йоген, мышкын Ӓвӓсирӹм,
Кодын шачыш паштек шачыш эчеӓт.
Цӓш дон ӹлӹмӓштӹ мондаш ак ли кидӹм,
Тӓнгвлӓн пуры кидӹм ак ли выртешӓт.
Шим ӹлӹмӓш йогым пыдештӓрен викок,
Тольы революци, лин мӓлӓннӓ цӓш.
Соты вим шӱлӓлтен кымда онгжы цицок.
Кеӓ мары халык шанымаш дон вӓш.
Кырык мары млӓндем, ош тыгыр гань садшы,
Пӱжвӹдешнӓ кушшы шурнын кымда ныр.
Пурын труйыш тӓнгем, пӓшӓ мырым шакты,
Сӓндӓлӹкнӓ йӹржӹ лижӹ пӹлгом тыр.
Софроний Гайдов, "Ир лыпш шыпшалмеш" лыдыш-сборник гӹц,с.6-7, изд-во "Периодика Марий Эл",Й-Ола,2001.Тидӹ кокшы книгӓжӹ, пӹтариш книгӓжӹ "Кышты амала шӹжвӹк" 1994 ин лӓктӹн.