Геннади Смирнов, Йынгы-Кушыргы
...Пӓлет махань кого "Йынгушыргы" сӓндӓлыкемжӹ ылеш?
Урын валыш Пошкырт вӓкш дорц
Кожваж алык мыч ӱлӹклӓ вала...
Изи Йынгы дон ушнымешок шылыш лым йӓр йӹр,
Кек-лыды паштек, Аштавай монгырыш пӹчкӹн лӓктеш.
Тӹшец пӹркем тӹшкӓм ӓен, пӱкшӹм кӹрӹн,
ыржа ныр вашт цӓрӓ яла кыргыжын,
каремвлӓ мыч мӧр дон калявонгым постарен
Лӱзын вуйыш куза...
Мӱӓн кугилӓ вӹд доно Сарлайыш йога -
неместӹм кӹчӓлӹн пистӹ тӹшкӓ лош пыра.
Морен какляка кишӓ доно Керемет куп лаксыш лӓктеш
дӓ Йынгы алыкыш вала...
Йыдвашт имни кӹтӧ паштек каштеш,
ирокжы кид дон колым кычаш
Кого Йӓмӹн уала важ кӧргӹш пыра.
Тӹшец "шанавӹл кӱӓн" урмаш лӹвӓк лӓктеш,
пындашдымы кого пӓрдӓш вӓрӹш вала
дӓ тура сирӹш кузен пышкыды сиремеш вазын
тӹ цӱдӓ колвлӓн мужедмӓшӹм цаца ынгылаш...
Пакылажы Ольгын Лык йӹр, Сазан-ӓнгӹр мыч -
алык вӹлвец тотлы пычым пӹчкеден,
полтик панды дон колым поктен, немоткаш пыртен,
ӓнгӹр мыч Кугилӓ-карем якте куза.
Вара Якыныр анзыц Тарашныр сирӹш сӓрнӓлеш
кӹдӹр кӹдӹрлӹм вёлкӹ Кого Шӹргӹш пырен кеӓ...
Тӹ шӹргӹ кӧргӹштӹ, шонгы тум лӹвӓлнӹ,
кайдымы-уждымы капка улы -
сӹнзӓвӹд вашт вел тӹдӹ кайаш тӹнгӓлеш,
дӓ тӹ капкам пачын мӹнь кыш шанем тӹш кен кердӓм -
хыть шӹдӹр шотлен Комбы Корны мыч чонгештем,
хыть кукурузы ныр тӹрӹш пракан имни корны дон валем -
тӹвеш Йорги дон Игыр мӹньӹм вычен шӹнзӓт...
Шергӓкӓн халык! Первиш тетя мадмашвлӓм ӓлмӓдӓ ӓшӹндӓрӓлнӓ. Ӹнянӓшӓт акли, 30-50 и перви кырык мары тетявлӓн ӹлӹмӓшӹштӹ кӹзӹтшӹ гӹц пиш айыртемӓлтӹн. Тагачы тетявлӓ компьютырышты ик парня доно мадын ӹлӓт, кӓпӹштӹ акат янгылы. Первиш тетявлӓжӹ каремвлӓ мыч ньоцок пӱжӓлтмеш, моч гӹц кемеш мадыныт. Мадмашвлӓ гач нӹнӹ кырык мары ӹлӹмӓш дон йӹлмӹм яжоракын ынгылаш тӹнгӓлӹнӹт. Шукы йиш мадышла мадыныт. Тӹ мондымы мадмашвлӓм тишӓк ӓшӹндӓрӓш дӓ постараш цаценӓ - тӓжӓт палшедӓ гӹнь, пиш кого тау!