Пал Генай, Йынгы-Кушыргы
- Ирокжы эче ма? Шокшы?
- Лым агыл ма тӱнӹ - покшым?
- Пӱӓштӹнӓ ижӹ кӹлмен?
- Конькиэмӹм ӓтям шымен?
- Изи тирем, ечемжӓт йӓмдӹ?
- Хоккейлӓн какляка панды?
- Вычалок пыйырт - яра?
- Йӹрвеш пӧртӱм ӱкшӹктӓрӓ...
- Тырхалок - эче вет ирӹ!
- Леведеш лым Кырык Сирым!
- Иргодым пӱӓнӓ кӹлмӓ!
(йыд вашт каеш омын сӹлнӹ!...)
"Чонгештем чӹнь комбы вӹлӓн...
Шӹдӹрвлӓ пӹл шайык шӹлӹт...
Пӹлгомым мешаклӓ ӹрзем!
Ялахай тел хозам вырсем!
- Ит кукырланы йӓ - Ӱштӹ Кугуза!!!
Мулӓндӹнӓ лымде шужа!.."
- Эй! Шижок, вет кечӹ лӓктӹн! -
(ӓвӓм йук цылан гӹц шакта...)
- Папат селмӓкиндӹм аварта!
- Тьотятжы тум кольмым кашарта!
- Тум кольмым?! - сӹнзӓэм йӹргештен
Окняшкы анжалаш тыргештем...
Ош лым цилӓ вӓре киӓ!!!
Лым вӹлӓн пачангеш пиэм!
Рокжат акат кай - ошы вел!
Мӓ токына толын ТЕЛ!!!
Талашен выргемӹм чиэм -
Кудвичӹштӹ выча тирем!!!
Кӹшӓнӹштем кагыль лаштык
(пиш шужем вет мадмаш паштек)
Карем тӹрӹш кыргыж мишӹм -
Лач кодышым келгӹ кишӓм...
Сир лапышкы тӧрӧк чӱктем!
Тирем дон лым йожым лӱктем!
.......
….
.
Техень цӱдӓм ӓшӹндӓрен
Ӧрт кеммеш сӹнзӓэмӹм кӓрем
“...Изи рвезаш тир дон кыргыжеш...”
Туан вел шӱм кӧргеш ӹлӹжеш...
Хыть... анзылнем тангыж веле
Ошма сирым ружген шелеш...
