Шергӓкӓн халык! Первиш тетя мадмашвлӓм ӓлмӓдӓ ӓшӹндӓрӓлнӓ. Ӹнянӓшӓт акли, 30-50 и перви кырык мары тетявлӓн ӹлӹмӓшӹштӹ кӹзӹтшӹ гӹц пиш айыртемӓлтӹн. Тагачы тетявлӓ компьютырышты ик парня доно мадын ӹлӓт, кӓпӹштӹ акат янгылы. Первиш тетявлӓжӹ каремвлӓ мыч ньоцок пӱжӓлтмеш, моч гӹц кемеш мадыныт. Мадмашвлӓ гач нӹнӹ кырык мары ӹлӹмӓш дон йӹлмӹм яжоракын ынгылаш тӹнгӓлӹнӹт. Шукы йиш мадышла мадыныт. Тӹ мондымы мадмашвлӓм тишӓк ӓшӹндӓрӓш дӓ постараш цаценӓ - тӓжӓт палшедӓ гӹнь, пиш кого тау!
среда, 20 января 2021 г.
ШАРТЯЛ
Анжалдок кыце Шартялым 1991 ин Пайскырыкышты эртӓренӹт.
Пиш шӱмӹм аварта - сӓмӹрӹк жепем вуйта мӹнгеш толын шагальы...
Иктӓжӹ пӓледӓ вӓл - кӱ ти цӱдӓ кином симаен?
Нӓлмӹ тишец.
четверг, 14 января 2021 г.
ТЕНГЕЖӸ, МАЛЫН?
Владислав Самойлов, Цермышал
Тыменьмӹ ыдылаш
Тенгечӹ
тагачы ма? -
Сартала мӹнь йылаш
Машанышым
шачынам...
Цилӓ пыжгаялты
Свет кайдым
поранышты,
А жепшӹ йорталта
Лымышты,
шоранышты.
Шӹдемӹм кычыде
Мӹнь йӓлӹм жӓлайӹшӹм.
Пеледде, йылыде
Цеверем шӓпкӓйӹшӹм.
Мӹнь шаныде худам,
Шутяла ытыртышым -
Ах, пӧртӹлтен пудай,
Мам шамде пыдыртышым!
Кыдалшы араван
кыргыжмы
сӹсӹргымӹк,
Сиремӹн ялавам
Темдӓлеш шке йӹр тӹмӹк.
Ах, тӹ ялаважы
Нӹжӹлгӹ...
Шӱм кӧргӹштӹ,
Тӹштӓт алашажы
Йӓ колтыктен
Тӧргӹш дон.
Кыцелӓ кынамжы,
Сӹсӹрген
мондалтмыла -
Варажы гӹнь
ямшым
Кӹчӓлӓш шыралтмыла!
Кӹчӓл тӹнь лымышты,
Ӓль пӹлгом мычашышты,
Триспортня лыкышты
Дӓ тангыж пындашышты.
Ма эртӹшӹм, кодшым
Мычашдымын ямдымы -
Ман тӹштӹ церотышты:
Келесӹ, жеп,
Шамдымы?!
Тӹнӓм, талашалын
Ӹлӹшӓш тагачынам -
Тенгежӹ гынь,
Малын
Мӱландыштӹ шачынам?!
Подписаться на:
Сообщения (Atom)