Алексей Юшкин, Пистерлӓ
Кырык мары район Пистерлӓ кӹдӓлӓш школын директоржы Алексей Владиславович Юшкин мары йӹлмӹм переген кодымы верц ӹшке шанымашыжым келесӹш: «Пистерлӓ кӹдӓлӓш школышты мары йӹлмӹм 100% тетя тыменеш, тидӹ нӹллӹ вӹц тыменьшӹ. Тенгеок эче школ сагашы тетя садышкы коклы тетя каштеш. Школышты ӹндекш тымдышы тымда да ик воспитатель пӓшӓлӓ. Остатка веремӓн цаклалтеш, садикӹштӹ тетявла марла попаш цӓрненӹт. Ӓтяӓвӓвлӓ тоныштат рушла веле попаш цацат. Шӹренок токем ядмаш доно толыт, мары йӹлмӹ вӓреш вес предметӹм шукырак пырташ ядыт, шамак толшеш, английский йӹлмӹм. Но мӹнь вуйлатышы семӹнь туан мары йӹлмӹм пакыла виӓнгдӹмӹ верц ылам, вет школыштат марла попаш тымдаш цӓрненӓ гӹнь, йӹлмӹнӓжӹ ямын кердеш. 2023 ин школна «Цифровая образовательная среда» программышкы попазен. Мӓлӓннӓ кымлы ӹндекш ноутбукым, кок электронный цифровой панельӹм, кок смарт-телевизорым дӓ принтер дон сканервлӓм пуэнӹт. Седӹндон компьютер класснам уэмден пачынна. Ӹнде цилӓ тетялӓн урокышты кычылташ ноутбуквлӓ ситӓт. Ӹшке пӓшӓштӹнӓ электрон ресурсвлӓм кычылтына, шукыжы годым тидӹ - «Моя школа» платформа. Кӹзӹтшӹ веремӓн школыштына, молнамшы доно тангаштарымашты, уроквлӓӓт, сакой йиш айовлӓӓт веселӓнрӓк эртӓш тӹнгӓлӹнӹт, малан манаш гӹнь, кӹзӹтшӹ тетявлӓ йара жепӹштӹм интернетӹштӹ эртӓрӓт, а мӓ у программывлӓ палшымы доно нӹнӹлӓн шукы у керӓл пӓлӹмӓшӹм пуэн шалгена. Тетявлӓлӓн техень йон доно тыменяш утларак келшӓ да тымдышывлӓн пӓшӓштӹм куштылемдӓ. Тымдышы платформывлӓ гач тетявлӓӓт, тымдышывлӓӓт сакой конкурсвлӓштӹ пӓлӹмӓшӹштӹм тергӓт. Тенгеок тене школлан тетявлӓм шыпшташ автомашинӓм пуэнӹт. Ӹнде мероприятивлӓшкӹ мӹндӹркӓт лӓктӹн кердӹнӓ. Английский йӹлмӹм тымдышы Наталья Ивановна Семёнова церкӹ хорыш мыраш каштеш дӓ кого айовлӓ годым тетявлӓмӓт сагажы мыраш кандыштеш». Алексей Владиславович Мары халыкын XII съездышты вес кымдемвлӓ гӹц толшы вуйлатышывлӓн опытышты доно пӓлӹмӹ лин да ӹшке туан школыштыжат ти у пӓлӹмӓшвлӓм кычылташ шана.
Налмӹ тишец: https://psv4.userapi.com/s/v1/d/PlzKhzGbrKtU8NVB-4h0UWLdEFTSmM398GoUwwX0vXQFiuTpNzoLNS2mHpVj3pA9owWrM77O8E32mZ85yVLOQf0jj7AiFP_TGFeg1jy6C0OgTpUG1B9KcQ/Sandalyk_2024-4.pdf, стр. 31
"Остатка веремӓн цаклалтеш, садикӹштӹ тетявла марла попаш цӓрненӹт. Ӓтяӓвӓвлӓ тоныштат рушла веле попаш цацат. Шӹренок токем ядмаш доно толыт, мары йӹлмӹ вӓреш вес предметӹм шукырак пырташ ядыт..." - тӓжӹ, шергӓкӓн кырык марывлӓ, ада тыргыжланы ма ти гишӓн???
ОтветитьУдалить