АРВУЙ

Пал Генай, Йынгы-Кушыргы

Йынгы, йур дӓ кечӹ-сарвуй -

Трӱк шанавӹл кузен кеш

Тӹшец лӓктӹ токем арвуй

Шыма мӹньӹм - сӹлнӹмеш...

Нимат ам керд тореш ӹштен

Шамым тӧрлӓ - ам уж вел

Тамам тарвем, тамам тышкем -

Полтик-панды акат кел...

Кого колым кычаш палшыш

Тӹ пӓрдӓшем ак мондалт

Йори кидӹшкем шыралтыш

Ӹшӓт шаны шӹлӓшӓт...

Мондымы корным уэмдӓрӓ

Пачеш капкам пӹсмӓн вашт

Руш лоц марым ӓштӹктӓрӓ -

"Кырык Сирӹш мӹнгеш кашт!"

Тӹштӹ, тонем, туан йӹлмем -

"Йынгы йонгын перегӓлт!"

Кӱ лӹвӓлӓн шӹлнем-ӹлӹнем -

"Шӧртньӹ пӓрдӓшем кӹчӓлт!"

Шанавӹлӹм кӱ лоц лыктеш

Вӹд-вӹтельӹ - изи кек.

Шонгы вӹлӹ вӹлӓн мыктем

Алык-пӹл мыч ымбал век...

Ивлӓ эртӓт - ак йам сарвуй

Ӱпем ошем кеш гӹнят -

Кырык марла тышка арвуй!

Кырык марла вел - мӹнят!