ВАНЖОК-ВАНЖОК КАРЕМ ГАЧ

Пал Генай, Йынгы-Кушыргы

Анжок-анжок тангыж гач - анзык лач

Ванжок-ванжок карем гач - корным пач

Ик изи ашкылымат шайык ит ӹштӹ

Ӓвӓт шӓмӓн анзылвач вӹсӹжӹ кидӹштӹ

Арава дон шӹргӹ гач, Пӹнгель гач

Шудым салаш Шурыш лач корным пач

Колыма-колма тангыж гач йукем лач

Ӱжӓм тӹньӹм - карем гач корным пач

Ик изи ашкылымат шайык ит ӹштӹ

Ӓтят мыры сем дон лач солам шижӹктӹ

Йынгы мычкы Йылыш лӓк йӹлерӓк

Йылымбалыш корным пач мӹндӹррӓк

Ӱжӹмӓ-ӱжмӓ мӹньжӹмӓт тангыж гач

Кенӓ коктын карем гач - корным пач

Ик изи ашкылымат шайык ит ӹштӹ

Кидем пуэм тӹньжӹ цат кычы кидӹштӹ

Кырык Сирӹш кузен ке Кӱшкӹ вел

Шанавӹл мыч корным пач кӱвлӓм шел

Пырок-пырок тангыж гач - анзык лач

Выча тӹньӹм туан вел карем гач

Ик изи ашкылымат шайык ит ӹштӹ

Мары йыхым цымыртал - мӧсквӓм пидӹштӹ

Кӓрш дон шактен вӹсӹ Кӱш - вӹсӹ кӱш

Шӹл шӹдӹр лош ӹнжӹ мо шӹдӹ руш...

Анжок-анжок тангыж гач - анзык лач

Ванжок-ванжок карем гач - корным пач...