вторник, 28 июля 2015 г.

Пӓлет махань кого "Йынгушыргы" сӓндӓлӹкемжӹ ылеш?...

Геннади Смирнов, Йынгы-Кушыргы

...Пӓлет махань кого "Йынгушыргы" сӓндӓлыкемжӹ ылеш?
Урын валыш Пошкырт вӓкш дорц
Кожваж алык мыч ӱлӹклӓ вала...
Изи Йынгы дон ушнымешок шылыш лым йӓр йӹр,
Кек-лыды паштек, Аштавай монгырыш пӹчкӹн лӓктеш.
Тӹшец пӹркем тӹшкӓм ӓен, пӱкшӹм кӹрӹн,
ыржа ныр вашт цӓрӓ яла кыргыжын,
каремвлӓ мыч мӧр дон калявонгым постарен
Лӱзын вуйыш куза...
Мӱӓн кугилӓ вӹд доно Сарлайыш йога -
неместӹм кӹчӓлӹн пистӹ тӹшкӓ лош пыра.
Морен какляка кишӓ доно Керемет куп лаксыш лӓктеш
дӓ Йынгы алыкыш вала...
Йыдвашт имни кӹтӧ паштек каштеш,
ирокжы кид дон колым кычаш
Кого Йӓмӹн уала важ кӧргӹш пыра.
Тӹшец "шанавӹл кӱӓн" урмаш лӹвӓк лӓктеш,
пындашдымы кого пӓрдӓш вӓрӹш вала
дӓ тура сирӹш кузен пышкыды сиремеш вазын
тӹ цӱдӓ колвлӓн мужедмӓшӹм цаца ынгылаш...
Пакылажы Ольгын Лык йӹр, Сазан-ӓнгӹр мыч -
алык вӹлвец тотлы пычым пӹчкеден,
полтик панды дон колым поктен, немоткаш пыртен,
ӓнгӹр мыч Кугилӓ-карем якте куза.
Вара Якыныр анзыц Тарашныр сирӹш сӓрнӓлеш
кӹдӹр кӹдӹрлӹм вёлкӹ Кого Шӹргӹш пырен кеӓ...
Тӹ шӹргӹ кӧргӹштӹ, шонгы тум лӹвӓлнӹ,
кайдымы-уждымы капка улы -
сӹнзӓвӹд вашт вел тӹдӹ кайаш тӹнгӓлеш,
дӓ тӹ капкам пачын мӹнь кыш шанем тӹш кен кердӓм -
хыть шӹдӹр шотлен Комбы Корны мыч чонгештем,
хыть кукурузы ныр тӹрӹш пракан имни корны дон валем -
тӹвеш Йорги дон Игыр мӹньӹм вычен шӹнзӓт...

20 комментариев:

  1. Яжон сирӹмӹ. Айыртемӹн кӓньӹл лыдаш ти монгыреш шачын-куштшы эдемвлӓлӓн. Вӓр лӹмвлӓжок кыце йӓнгӹм лӹплӓндӓрӓт дӓ тӧрӧк тошты годшы ӹлӹмӓш ӓшӹндӓрӓлтеш, вет кӹзӹт цилӓ вашталт шӹнзӹн, сӓмӹрӹквлӓжӹ моло акат пӓлеп тидӹвлӓжӹм, тидӹ вуй шамешнӓ веле перегӓлт кодын. Генайын сирӹмӹжӹ- тидӹ поэтический произведени ылеш. Тӧрӧк тидӹ кымда образым шачыкта.

    ОтветитьУдалить
  2. Тау-тау! "Айыртемӹн кӓньӹл", "лӓплӓндӓрӓт", "вуй шамеш" - ти яргата кырык марын шамаквлӓм ӹшлӓнемӓт переген урдаш келеш. Йӹлмӹнӓ чоте чӹнь ямеш... Сусу ылам палшымланда! Эчеӓт тау!!!

    ОтветитьУдалить
  3. Пошкырт вӓкш, Ӓпшӓт нер, Кожла алык, Изи Йынгы, Кек-лыды йӓр, Аштавай монгыр, Лӱзин вуй, Мӱӓн кугилӓ,Сарлай, Керемет куп, Кого йӓм, Ольгын лык,Сазан-ӓнгӹр, Кугилӓ карем, Кого шӹргӹ, Комбы корны- цилӓ тидӹ Генайын "Йынгушыргы сӓндӓлӹк"-шӹ ылеш. Малын Йынгы Кушыргы моло агыл? А вот тӹдӹ тенге ӹшке йӹлмӹжӹ доно попа, а йӹлмӹжӹ тӹдӹн айыртем йӹлмӹ ылеш. Генайын сирӹмӹжӹм лыдмыкы, лачокат тамахань цӱдӓ сӓндӓлӹкӹм ужын колтет, тидӹ вуйта тагышты мӹндӹрнӹшӹ, изиш мондалтшы сӓндӓлӹк ылеш дӓ теве Генайым тӹштӹ Йорги дон Игыр вычен шӹнзӓт. Мане, ӹлӹмӓш вашталтеш дӓ цилӓ вашталтеш. Ӓшӹндӓрем Кого Васлин Йоргижӹмӓт, тӹдӹ колхоз машинӓжӹ доно,мӓмнӓм, школьниквлӓм, со Йоласалыш шыпштен кеӓ ыльы дӓ Авдонькин Игырымат, нӹнӹ ик лык гӹцӹн,Генайын тӓнгвлӓжӹ виднӹ ылыныт. Эх, тӹ сӓндӓлӹкшӹм кӹзӹт мӹнгеш сӓрӓл кандаш лиэш ылгецӓт!...
    "Вашталтеш, вашталтеш цилӓ со, тагачы тенгечӹш ана шо. Нимат, нигнамат иктӹ агыл- техеньӹ тышкалтеш падкагыль" веле манаш кодын.
    Ондрин Валька, Йынгы Кушыргы солаэш шачын-куштшы рвезӹ.

    ОтветитьУдалить
  4. МЫРЫ СЕМЕМЖӸ
    ЛИЖӸ КУШТЫЛГЫ.
    ШАЧМЫ ВЕЛЕМЖӸ-
    ЙЫНГЫ-КУШЫРГЫ!
    Тидӹм солана поэт Ондрин Валька сирен

    ОтветитьУдалить
  5. Тау, пӓлӹдӹмӹ, шотеш пиштӹмӹ Анонимный! Пиш яратем ти мытык лыдышым!!! Эче пакылажат улы гӹнь - анжыктыдай... Пуры лидӓ!

    ОтветитьУдалить
  6. ЙЫНГЫ-КУШЫРГЫ

    Мыры семемжӹ
    Лижӹ куштылгы:
    Шачмы велемжӹ-
    Йынгы-Кушыргы.

    Кеем кышкы гӹнь
    Йыдым-сотыла,-
    Токеток толам,
    Токеток толам.

    Шӧртньӹ шергӹлӓ
    Каят палныла,-
    Ӹдӹр-эргӹвлӓн
    Со вет йӓнг йыла!

    Уэт-тоштетшӹм
    Ивлӓ вӓш погат,
    Кок сир лоштетшӹ
    Ире вӹд йога.

    И гӹц ишкӹлӓ
    Ылат пӓлӹкем,
    Ӱжеш тишкӹлӓ
    Роды халыкем.

    Кӓнгӹж ирӹштӹ
    Кузем кӱшкӹлӓ;
    Йынгы сирӹштӹ
    Кечеш нӱштӹлӓт!

    Мыры семемжӹ
    Лижӹ куштылгы:
    Шачмы велемжӹ-
    Йынгы-Кушыргы!

    ОтветитьУдалить
    Ответы
    1. Мынь ышкежы кожламары Мазикино гыц ылам, лымемжы Нина. Атям пога ыльы газет лаштыквлам, "Икана Опанас"-влам,юморым, стихотворенивлам. Пиш кого папкы кодын, ышкежы 10 и перви колен. Ондрин Валькажым мынь ышкеат палем,пиш яратем сирымыжым, седындон вот "Жера" газет лаштыкышты ти стихотворенижым монам да таланда колтышым.

      Удалить
  7. Пиш кого тау, шотеш пиштӹмӹ Нина! Ужда сӓй - ти яжо лыдышым пасна публикацишкӹ лыктын ӹнде цилӓлӓн анжыктем.
    Мӹнят Валентинӹн лыдышвлӓжӹм чоте яратем, а тидӹжӹ йонгата мардежлӓок соланам кӱш лӱктӓ...
    Кожла Сир ӹлӹмӓш гишӓн сиремӓдӓ, тидӹ вет мӓланнӓ когон интереслӓ ылеш. Лия-ӓкӓм перви со тӓ монгырышкыла рижӹк погаш каштеш ыльы. Имни арававлӓ дон мол вачкывлӓэш санзалтым понгым кандат ыльы... Пӧчӹжжӹмӓт тенгеок тӹ жепӹн погенӹт. Кӹзӹт техень "экспедициш" Кырык Сир гӹц тӓ сирӹш толыт вара?
    Лачок кожламары культуры вет мӓмнӓн гыц айыртемӓлтеш. Мынь шим шӹргӹ халыкым когон яратем, но шукымок ӹлымӓшдӓ гишан ам пӓлӹ.
    Сиремӓдӓ, да пашкудывлӓдӓмӹт ядымада! Ти блогым вет Руш эл мыч вел агыл, вес сӓндӓлӹквлӓштӓт лыдыт...
    Тау эчеӓт, шергӓкӓн Нина!
    Пуры лижӹ!

    ОтветитьУдалить
  8. Кожламары мландӹм шукыжок шӹргӹ йӓшнӓ.Молнам Арде монгыр дӓ Визимйӓржӓт Кырык Мары районыш пыренӹт ылын, а кӹзӹт тидӹ цилӓ Килемар районын территорижӹ лин.1981 и анзыц Йыл Коротняк донок йоген эртен, корны Коротняк гӹц Арде якте пиш мытык- 8 уштыш нӓрӹ веле ылын, а кӹзӹт теве йӹр 35 уштышым кемӹла. Чебоксар ГЭСӹм пӱэн шӹндӹмӹ паштек, вӹд пиш шукы вӓрӹм нӓлӹн колтен, когонжок кожламарывлӓ эксӹкӹш пыренӹт, теве Коротняк, Отар сола, Дубовый дӓ вес солавлӓӓт кого вӹд лӹвӓк линӹт. Кӹзӹт Йыл вӹдшӹ Мазикино докок толын шагалын. Тиш кӹзӹт Йошкар-Ола гӹц дӓ вес вӓрвлӓ гӹцӓт кӓнгӹжӹмӓт-телӹмӓт кол кычаш толыт. Йори, гостиницы семӹнь томавлам молы тиштӹ нӹнӹлӓн йӓмдӹлен шӹнденӹт. Толыт ӓрняэш молы...Тевеш эксӹквлӓӓт лиӓлтӹт, иктӓ лу кечӹ эртӹш,мардежӓн годым пышышты сӓрнӓлт вазын, кым эдем Мазикино туре вален кенӹт.Телӹмӓт пиш когон кол кычаш толыт. А шӹргӹштӹ кӹзӹт пиш пӧчӹжӹм(клюквым) погат. Каляпонгым погаш Кырык Сир гӹцӓт пиш каштыт, эче мудым(черника) ӹнгӹжӹм, шим ӹнгӹжӹм(ежевика) дӓ вес мӧрвлӓмӓт погаш тиштӹ йӧн улы. Шӹргӹнӓ вет пиш паян, молнамжы моло тиштӹ шӹргӹ пайда донок ӹленӹт. Опонгавлӓжӹ! Вачкывлӓ доно санзалтенӹт. Пӧчӹжӹмӓт мешӓквлӓ доно погенӹт.Выжалаш. Вет пӧчӹж пиш шергӹ ылын. Урвлӓмат кыченӹт, каваштыжым выжаленӹт.Эче лый ылын.Тожы каваштыжы шергӹ. Шардывлӓӓт, мӧскӓвлӓӓт молнам тиштӹ чӹдӹн агыл каштыныт, мӧскавлӓнӓт кыды тидӹ томашты каваштышты ылын.А кӹзӹт тинӓрӹжок уке седӹ, но остатка веремӓн пирӹвлӓ пашен шӹнзӹнӹт маныт доко.Кыды ин вет Арде сола гач моло пиры партьы эртен, пивлӓжӹ моло цилӓн ородыш кенӹт дӓ шӹлӹнӹт.

    ОтветитьУдалить
    Ответы
    1. Кожламарывлӓ веле агыл вӹд лӹвӓкӹ линӹт, Йӱрнӹ районжымат идӓ монды.

      Удалить
  9. Пиш кого тау, шергӓкӓн Нина! Чоте яжон сирен мыштедӓ. Дӓ мытык сирмӓшдӓок Кожла Сир гӹц цилӓ йиш увервлӓм мӓлӓннӓ кандыш. Сусужат, сылыкжат улы...
    Пасна публикациш сирмӓшдӓм лыктым - цилӓлӓннӓ пиш керӓл техень шайыштмашвлӓ.
    Пакылаат сиремӓда - туан йӹлмӹдӓ пиш йонгата, дӓ шӹргӹ халык ӹлӹмӓшжӹмӓт витнӹ пиш тӧр пӓледӓ.
    Шайыштмашдам лач Нина лӹм дон вел авторизуйышым. Шанедӓ гӹнь тенгеок кодем, агыл гӹнь хыть фамилидӓм, хыть псевдонимӹм сирен колтыда - тӧрӧк тӧрлем...
    Пуры лижӹ!

    ОтветитьУдалить
    Ответы
    1. Матвеева Нина.Сирӓшӹжӹ ӹдӹрем палша.Тау пуры шамакланда.

      Удалить
  10. Таня, тау, кӹзӹт вел лӹмдӓм ужын колтышым. Лачок-лачок, Йӱрнӹ монгырыштат пиш шукы цевер мулӓндӹ вӹд лӹвӓк ямын. Пиш яратем ыльы токыда толаш - шӹргӹштӹ тамахань вес йиш тумайымашвлӓ вуйышкыжат пырат... Первиш важвлӓ вуйта пачылтыт дӓ сӹнзӓвӹдӹм рок лӹвӓц йоктарат... Сулык...
    Ӹшкӹмдӓн шанымашвлӓдӓм сиредӓ гӹнь тӹдымӓт тиштӹ цилӓлан тӧрӧк анжыктем. Халыкнан тыргыжланымашым йӹрвеш пӓлдӹртӓш келеш...

    ОтветитьУдалить
  11. Генай ыза,"Пӓлет махань кого "Йынгушыргы" сӓндӓлӹкемжӹ ылеш?..."сирыметым сынзавыд гыц пасна ик ганакат лыдын кердделам. Пиш яжон цила ашталтеш, эчежы Георги дон Игорь торок ашеш вазыт. Тау тылат.

    ОтветитьУдалить
  12. ондрин валька3 ноября 2018 г. в 10:55

    Йынгы- Кушыргы йӹр пиш цевер сӓндӓлӹк, иктӓт седӹ тидӹн ваштареш агыл. Но сек кого пайдажок- тидӹ ти солашты шачшы дӓ ӹлӹшӹ эдемвлӓ.Йынгы-Кушыргы йӓл солавлӓ дорц изиш паснарак ылеш, йӓл дорц ти солам Кого Йынгы дӓ Сазан ӓнгӹрвлӓ ӓрӓт, кӓнгыжӹм кого юрвлӓ паштек корнывлӓ пиш лявӹрӓн лин шӹнзӹт ыльы, нимахань машинӓ эртен ак керд, а телӹм лым кого пуалтемвлӓм йӧрен шӹндӓ- тожы солаш уты гӓнӓ куштылгын пырен ат керд. Седӹндон, Йынгы-Кушыргы халык первишенок со пасна общины доно ӹлен, эдемвлӓ тиштӹ ӹшке семӹнь ылыныт, икӓнӓ-иктӹлӓн ӹнянен,шотеш пиштен, соредӓлдеок ӹленӹт, йӓл дорц пуры ылмышты доно айыртемӓлтӹнӹт.Но ӹшкӹмыштӹн лӹмнерӹм нигыштат валтыделыт, ӹдӹрвлӓ чиэн мыштенӹт, пиш косирвлӓ ылыныт, нӹнӹм дажы пашкуды суасламары солавлӓшкӓт марлан нӓлӹнӹт. А млоецвлӓ гӹнь чоте патырвлӓ линӹт, йӓл доно шиэдӓлмӓштӹ моло иктӹланӓт махым пуделыт, со сӹнгӹшеш лӓктӹнӹт. Млоецвлӓ ӹшкӹлӓнӹштӹ ӹдырвлӓм вес солавлӓштӹ кӹчӓлӹнӹт дӓ сӱӓн доно нӹнӹм канденӹт, техень сӱӓн- "спектакльвлӓм" анжаш пиш цӱдӓ ылын. Солана вӓтӹвлӓ ӹнде тагыды монгыр гӹцӓт ылыт, шукыжок толшывлӓ,седӹ, икманаш солашкына цилӓ кырык мары йиш цӹре погыналтын.Тидӹжӹ худа агыл, а мӹнгешлӓ, пиш яжо.Махань цевер ӹдӹрвлӓм дӓ патыр эргӹвлӓм нӹнӹ шачыктенӹт. Йынгы-Кушыргы сола ӹшке лӹмлӹ эдемвлӓжӹ доно ӹнде когоэшненӓт кердеш. Шукыжымок тӓ пӓледӓ.Ти эдемвлӓжӹ пашкудывлӓдӓок ылыт.

    ОтветитьУдалить
    Ответы
    1. Мӹнь Мату Нина ылам, Йынгы-Кушыргышкы Шунӓнгыр сола гӹц марлан толынам, тӹштӹ Йӹлйӓл, Шӹндӹрйӓл солавлӓ эче улы. Лачок, теве пашкудывлӓэмок Нина, Афанасьев Ондри вӓтӹ, Шекмӓн сола гӹц толын,кӱшыл пашкудем, Роза Ивановна, Йынготы гӹц, Мари Захаровна, тожы Йылйӓл монгыр гӹц, дӓ шукы-весӹвлӓӓт: Йӓкӹнӹр гӹц, Пистерлӓ гӹц, Паратмар гӹц...Икманаш, лачокат, цилӓ кырык-мары монгыр гӹц Йынгы-Кушыргы солаш ӹдрамӓшвлӓ марлан толыныт.Шукы йиш вӹр тиштакен ярлен. Эдемвлӓ тиштӹ цилӓн пуры йӓнгӓт ылыт, пӓшӓштӓт пиш дружнан ровотаят, икӓнӓ-иктӹлан со палшат.

      Удалить
    2. Пуры шамакланда кого тау, шотеш пиштӹмӹ Нина! Тӓмдӓм ӓшӹндӓрӹшӓшлык ылам, но нигыцеӓт ам керд (йӹрӓрлтӓлшӓш вел...). Мату Елисӹм ӓшӹндӓрем - тӹдӹжӹ ротньыкда ылеш ма? Кыце вара ӹнде соланажы ӹлӓ-шӱлӓ?
      Ӱштӹ тел толын? Ма, ӹне первишлӓ шӹнзӓш икӓнӓ-иктӹ токы каштыда? Мам ӹштӹкӓледӓ шӹнзӹм вашт? Йыдал ӹнде ак кел ӓӓ? Ӓль сувенирлӓ мол выжалаш лиэш ӓнят? Миж носкивлӓм-пижоргывлӓм пидӹн шӹнзедӓ? Тидӹмӓт тене халашты выжален кердӓт сӓй! Мам эче?
      Ышемӓт ак ситӹ ти кужы вадын шокшы камака сага шынзен тӓмдӓн тенешӹ пӓшӓвлӓм пӓлдӹртӓш...
      Ӓль цилӓнок ынде интернетӹштӹ вел шӹнзӓт???
      Сирӓлтӹдӓй эртӹш вадын мол мам ӹштендӓ?
      Тау дӓ пуры лижӹ!

      Удалить
  13. Алталымаш ӹнжӹ ли, мӹнь такшым ыныкашты веле ылам,но мӹньӹнӓт лӹмемжӹ Нина, шонгы эдемвла нимат ти делавлӓм кычылт ак мыштеп.Мане, Матуковвлӓм Мату маныт. Тевеш, Мату Елис дон Мату Веник- ӹзӓк-шолявлӓ ылыныт, коктынат нӹнӹ ӹнде коленӹт, вӓтӹвлӓштӹ дӓ тетявлӓ-ыныкывлӓштӹ веле ӹлӓт. Мату Нинажы, Мату Веникӹн вӓтӹжӹ, уже кӓндӓкшлу им эртен, цаткыды шулыкым веле тӹдӹлан согоньленӓ. Солана вӓтӹвлӓ шӹренжок иктӓжӹ колен кемӹкӹ веле, тӹдӹм ыжатен колташ дӓ ӓшӹндӓралӓш иквӓреш погыналыт. Тел ӱштӹ, тидӹ тенге,лым цилӓ вӓре вазын, кого пуалтемвлӓм йожтен шӹнден. Солашты ӹнде первишӹлӓ агыл, эдемжӓт чӹдӹрӓк лин, ӧлицӓштӹ кынамжы иктӹмат ат уж. Но соикток ӹдрӓмашвлӓ икӓнӓ-иктӹ докы каштыт, но техень молнамшыла шӹнзӹмӓш-влӓ, кид пӓшӓвлам ӹштӹмӓшвлӓ кӹзӹт улы вӓл, ӓнят... Цилан ӹнде телевизор сага шӹнзӓт. Йыдалым тагынамок монденӹт, а носки-пижоргывлӓм пидӹт седӹ, тьосынкымат-мижгемӹмӓт кыды шонгыракшы чиӓлӓлеш, но шоэн, шукыжок лапкашты нӓлмӹ кемвлӓм веле чиӓт. Хала пазарыштат кид-пӓшӓ хӓдӹрвлӓм мары вӓтӹвлӓ моло выжалат, но Кушыргы гӹцшӹ эче иктӹмат ужделам доко. Шокшы камака гишӓн попедӓ, ӹнде камакавлӓжӹмӓт шукынжок солашты пыжен шуэнӹт, вет тӹдӹ нелӹ да пиш шукы варӹм йӓшнӓ, а шокшыжым газ-котёлвлӓ пӧрт йӹр трубавлӓ мычкы пуэн шалгат, тидӹ пиш йӧнӓн.Интернет шотышты циланок тӹштӹ ак шӹнзеп, а кӱн оксажы компьютерӹм нӓлаш дӓ интернет тӓреш тӱлен шалгаш улы. Ӹлӓт незерӹн. Молодёжь в основном цилӓн халавлӓш кен колтенӹт, мӹнят теве халаштӹ ӹлем, толындалам веле,солаштыжы пӓшӓ уке, кӱ тетя доно шӹнзӓ, чӹдӹн кодыныт дӓ шукынжок пенсионервлӓ веле. Эртӹш вадын мӓ папам доно ма-шоным стрӓпӓйӹшнӓ дӓ тошты годшы ӹлӹмӓшӹм ӓшӹндӓрӹшнӓ.Папи-тьотивлӓ пиш шукым пӓлӓт да тевеш ти блогышты сирӹмӹвлӓмӓт лыдына. Тау тӓлӓндӓӓт!

    ОтветитьУдалить
    Ответы
    1. ондрин валька2 февраля 2019 г. в 02:31

      Э, сӓмӹрӹквлӓ тиштӹ кыды-тидӹ моментвлӓм куктыл шӹнденӹт. Мату Нинажы ик тома гач кӱшӹл пашкудына ылеш. Мӹнь нӹным яжон пӓлем. Икеӵы Кушыргыш толмем годымат, тӹдӹн дон пӱлӓ попен шалгышым.1929 ин Йынгы-Кушыргышты "У жерӓ" колхозым организуйымы ылын, пӹтариш председательжы Н.И Матуков лин, тидӹ как раз нӹнын тьотяшты.А эче сагана, пичӹ гач пашкудемок, Виноградоввлӓ, Владислав Петровичшӹ, генерал-лейтенант лин. 2010 ин ӹштӹмы переписьышты солаштына 212 эдем ӹлен, 102 пӱэргӹ, 107 ӹдӹрӓмаш, кӹзӹтшӹ эче чӹдӹрӓкӹн кодыныт векӓт, вет колышывлӓ шачшывлӓ ваштареш шукырак линӹт.Солашкына, лачокат ӧрдӹж варвлӓ гӹц пиш шукын марлан толыныт. Ӓвӓм, Пекунькина Нина - 2-шы Шекмӓн гӹц, Роза Ивановна Йынготы гӹц агыл, Песерал гӹц толын, Мария Павловна Мария Захаровна агыл,самынь сиренӹт, тӹдӹжӹ весир ылеш, со бригадирӹштӹ кыргыжталы,Мари Палынныжы- Йоласал сельпон бухгалтержы ылын, Йылйӓл монгыр гӹц Сергеев Софроньлан марлан толын, Сидыр Лийы( Купри Колян ӓвӓжӹ)- Тарашныр гӹц, Софронь Вадимӹн вӓтӹжӹ- Йакыныр гӹц дӓ пакылаат тенге лыдын кеӓш лиэш : Паратмар гӹц, Порандай гӹц, Парнингӓш гӹц, У сола гӹц...дӓ тӹлец молат. Солашты лачокат кыдыжы камакавлӓштӹм пыжен шуэнӹт дӓ вӹд пычвлӓм пӧртышкок шыпшын пыртенӹт, краным веле пӹтӹрӓл, вӹд йоген лӓктеш. Молнам мӓ вӹдӹм выдвӓрӓ доно Ондри вал гӹц намалына ыльы.Мату Веникӹм остатка гӓнӓ 2009 ин кӓнгӹжӹм ужым, тӹнӓм мӹнь сола айош толынам ыльы. Коголидӹш каштмем годым тӹдӹ кӹтӧм кӹтен шалга ыльы, фотографируйышым моло, вара фотожым нӹнӹлӓн колтенӓм, ышкалвлӓ сага пиш яжон лӓктӹн.Такшым ти семья толковыйвлӓ ылыт. Эргӹштӹ, Владикӹштӹ, Чапаев лӹмӓн колхозым кидӹшкӹжӹ нӓлӹн дӓ тӹштӹ хоза семӹнь пӓшӓлӓ, пӧртшӹм Цермышал пӱӓ сага строен шӹнден.Ӹжӓл вот, что кӹзӹт Кушыргышты пӓшӓ уке, ӹрвезвлӓ сола гӹц шӹлӹт...Бабушкин изиш палшалта гӹнь веле, вет тӹдӹ Кушыргы сага ӹшке производственный базыжым кӹзӹт строя, ӓнят тӹштӹ ӹрвезӹ эдемвлӓлӓн иктӓ-маняр пӓшӓ вӓр лиэш.

      Удалить