ИГЕЧӸ

Пал Генай, Йынгы-Кушыргы

Тенгечӹ тӓрвӓнӹшӹ кечӹ
Тагачы воксьок акат кай
Иргодым игечӹ ылгечӹ -
Ынгай...

Тӓ лӓктеш, тӓ йамеш кӱсоты
Сотемеш шӹдӹрӓнгшӹ лык
Тымана тышманемӹм покта
Тыл вӹк...

Тӓрвӓнӹш-тӓрвӓнӹш тымаша
Ырвалатат пиш куза кӱш
Шур алык мыч мӹнер амашвлӓм
Тӹнь уж...

Иргодым игечӹ лишӓшлык
Шӹдӹрвлӓ шӹдӹрнӓт тӹ век
Комбы корны мычок толшашлык
Кӱн кек?...

САЗАН-ӒНГӸР

Пал Генай, Йынгы-Кушыргы

Тьорга-льорга Сазан-ӓнгӹр
Ӹмӹл шӹлеш лӱлпӹ лош
Ошма пындаш, шун-ӹрдӓнгӹш
Вӹд важ тореш - ваштыр пош

Ыржа-мольы, шим алангы
Пӓрдӓш игӹ, мӱктӹжӓт
Кадамавлӓ, пынтӹрвӹвлӓ...

Нӹнӹм ужын ӹшкежӓт
Ӓнгӹр вӹдӹш вазам тырын
Изиэмӓм мӱктӹ гань
Йӹрем колвлӓ кӓпем шырен
Поктат пошыш - полтик гӓнь

Шӱкшӹ кӹвер - тетя тӹшкӓ -
Анжат вӹкем ош вӹд вашт
Пӹлвлӓ логӹц пышвлӓм кӹшкӓт -
Пышыш шӹнзӹн - коэн мыштен
Мӹнь шон кердӓм Йынгышкат

Ольгын лыкыш лӓктӹн ужам
Шанавӹл Кӱм ӱлнӹрӓк
Тӓнгвлӓм Кӱшкӹ кузаш ӱжӓм
Йӱкым ак пуэп иктӓт

Ма техеньӹ - пыт цӱдеем
Сӹнзӓм кӓрем кугилӓш
Анжен тӹш ородыш кейем
Цилӓн кенӹт шӹгерлӓш...

Цилӓн тӹштӹ киӓт тырын
Ӱлнӹ ль, кӱшнӹ ль? Пӓлӓ Кӱм!
Йыхнан шӱмӹм урдат ырен
Шанавӹл дон Шонгы тум...

..........
Шанавӹл Кӱ - Йынгы сирӹштӹш пӓлӹмӹ вӓр. 400 и тӹ Кӱ лӹвӓлнӹ Йынгы-Кушыргы халыкын йыхжы перегӓлтеш маныт...
Кӱм - ӹдӹр лӹм. Кынам гӹнят Кӱм шачеш Шанавӹл лӹвӓлнӹ, дӓ лӹвӓл кӱвлӓм лӱктен халыклан воляш корным пачеш маныт тӧкӧ...