ШӒР-ШӸРТӸ

Пал Генай, Йынгы-Кушыргы

Кырык Сир - эчеӓт ужаш цацем
Эчеӓт амасавлӓдӓм пачам
Шокшы пӧртвлӓш котивлӓдӓм пыртем
Шамдам темӹнем - шыпшам шӓр-шӹртӹм

Тондаок тангатала шӹнзедӓ
Парням вел телефоныш шыредӓ
Кӹтӧ уке, ак йылы камака
“Трамп дон Путин”- колыда шамакым

Вуйвлӓ сӓрнӓт: "Пӹсмӓнвлӓ ражемӹт?!?!"
Тангыж кошка - тӹр гач ак йам кемет?
Земля йӹр каштын кердӹдӓ ӹнде?
Кӱлӓн сартажым мыштымла шӹнден?

Ӹнде ма? Тышман агыл ма НАТО? -
Шӹгерлӓш кыргыж миш тылык вӓтӹ
Лыктеш марым шун лоц шытырланен:
"Эх, йалахай! Кӹньӹлок - орланем!
Ӹшкетӹн ам керд, палшалтай мӹньлӓнем!
Нимат ам пӓлӹ - ма ӹнде лиэш...
Тышман сӹнгӹш! Эй! Ситӓш йӓ киӓш!!!"

Йӱкдеок киӓ марыжы тӹштӹ
Вӓтӹ вазеш сагажы тӹрӹштӹ
Кӱшкӹ анжа - сӹнзӓвӹд дон темеш
Ӹлӹмӓшжӹ шимемеш-шимемеш...

 

ЭРТӒ-ЭРТӒ

Пал Генай, Йынгы-Кушыргы

Эртӓ-эртӓ кечӹ паштек кечӹ

Эртӓ шачмы... эртӓ кукшыгечӹ

Сартам чӱктӓт - йакшар вӹр ушланен

Йӓрвлӓ ӱкшӓт - кӹлмӹш рок касланен

Киӓт марын кӓпвлӓ вескид мычкы

Корным сылык пычда мӓгрен пӹчкӹн

Ядмаш уке - пӓлӓ сола халык

Махань вӹр дон темеш шачмы алык..,

Сӹнзӓ мыч йалнерӹш намыс шӹлӹн

Кугижӓ дон ӓвӓт кӹлден окса кӹлӹм

Йукде мӓгрен каштеш шӹгерлӓшкӹ

Ядмаш уке... Кол лу вел ышмашты...

Салым-сола - ам ынгылы иктӹм -

Кышкы корным Акпарс-патыр виктен

Яра халык, утым амат тӹкӹ -

Кырык марым алык мары шӹкӓ?

Рушвлӓ толмык маняр курым эртӹш -

Мари Элым шу гӹц кӱ кӱэртӓ?

Шӱдӓм мӧсквӓ кычен кужы кид дон

Шӹдӹ пирӹм колтен шуан вим дон

Пакы ӹлӓш-кузаш рушла вел ма?

Йадам тӓмдӓм: "Марла шижӓш нелӹ ма?"

Руш кугижӓ колта тӓнгвлӓм пушташ

Цикмӓш оксам - "Мырым-мыраш", кушташ...

Шарык постол йукын лавыж кедӓ

Эх, махань келтӹмӓш! Шыр лошток ӹледӓ!

Волян - ӹшке семӹнь ӹлӹмӓш вескидӹн

Но нӹнӹмӓт шыр лош шыпшеш рушет пидӹн

Кечӹнь шим мешӓкеш шергӹ мары миӓ

Рушла халык мӓгрӓ - шукы эргӓш киӓ...

Кедӓ-кедӓ ӱлӹк - кузаш кӱш сарвален

Мары халык пӹтӓ рушвлӓ верц шидӓлӹн

Мӹндӹрцок мужедӓм ӓштен Кырык Сирӹм

Керддӓй йӓ кедӓрен шӱ гӹц нелӹ кирӹм

Шкежӹ мам вара кердӓт? - йадыда мӹньӹм тӓжӹ

Цилӓн ӓптӹргенӓ - ышмана кымда ражан...

Эх!!! Цеверӹн код, цеверӹн код...