Геннадий Замятин, Йӱрнӹ
Шӹжӹш мардежвлӓжӹ тиштӓкен
Эдемвлӓм да сиреньвлӓм ӓйӓт.
Дӓ мӹнь турешем вуйым сӓкем:
Вӓл ӹнде кӱжылӓн ӹнянӓш...
Сар ӹлӹштӓшвлӓ ялем тервен
Ӹрӹктӓш ядыт лач котилӓ.
Дӓ йӓнгӹштемжӹ вуйта шервлӓ
Шотаялт миӓт эртыш ивлӓ.
Мӱлӓндӹ мычкы шӹжӹ тангыж
Ӹшке пӧртемӹш мӹньӹм нӓлеш.
Ӹндежӹ ма доно ладнангаш,
Кынам йӹр чучеш пиш ӹжӓлӹн.
Ӓль тӹ ик эдем вӓшлиӓлтеш,
Лач кыды пиш мӹндӹркӹ ужеш.
Да пурын мӹлам келесӓлеш:
«Корнедӹм эртен кеет кужым»
Пушӓнгӹм сӹрен цӹре жерӓн
Техень юалгы юран шӹжӹм.
Мӹнят ынгылем ти цеверӹм...
Тамажы йӓнгӹштӹ ӹлӹжеш
Сылык корнывлӓ. Геннадий Замятин гишӓн молнам колделам, но кодшы жепӹн Кырык мары группышты дӓ тиштӹшӹ мадмашвлӓштӓт кайыкалаш тӹнгӓлӹн доко.Лыдышвлӓм пидӹн мышта. Но ти стихотворенижӹ когонок ак келшӹ.Нӓлшӓш икшӹ строфам:
ОтветитьУдалитьШӹжӹш мардежвлӓжӹ тиштӓкен
Эдемвлӓм дӓ сиреньвлӓм ӓйӓт.
Дӓ мӹнь турешем вуйым сӓкем:
Вӓл ӹнде кӱжӹлӓн ӹнянӓш...
Эдемвлӓм дӓ сиреньвлӓм...Малын эдемвлӓм? Малын сиреньвлӓм? Сиреньвлӓжӹ майын веле пеледӹт вет? Коли техень пушӓнгӹ ӓйӹшӹ ураганвлӓ мӓ донна шӹжӹм лиӓлтӹт- эдемвлӓмӓт ӓйӓт? Дӓ мӹнь турешем вуйым сӓкем: Вал ӹнде кӱжӹлӓн ӹнянӓш...Ядмы знак уке.Значит, пӹлгомыш вуйта келесӹмӹ.
Мам цилӓ ти корнывлӓ дон пӓлдӹртӹнежӹ ылын?
Ӓль тӹ ик эдем вӓшлиӓлтеш,
Лач кыды пиш мӹндӹркӹ ӱжеш.
Дӓ пурын мӹлӓм келесалеш:
"Корнетӹм эртен кеет кужым"
Тиштӓт тагыце-ӓнят вуйын-пачын сирӹмӹ. Раскыды агыл. Шӹжгӓ.Поэт ӹшке веле пӓлӓ, мам сирӓ...
Пушангӹм сӹрен цӹре жерӓн
Техень юалгы юран шыжӹм...
Тидӹ яжо образ. Анзыкыла ӹнянӹмашым шачыкта.
Автор сирен мышта, но тиштӹ соикток рушла манмыла талашенрӓк "сумбурно" сирен шӹндӹмӹ.Кынам-тинӓмжӹ шамаквлӓн варвлӓштӹмӓт вашталтен колташ лиэш ылын сӓй.Но, нимат агыл, цилӓ тидӹм эче яжоэмден шӹндӓш лиэш.Тау.
Кого тау, Надя! Кырык Сир поэзим яжон паледӓ витнӹ... Кырык марын "классиквлӓ" лошты махань лыдышвлӓм лӹмден кердӹдӓ? Мӹнь блогышкы ты лыдышвлӓм пиш сусунок лыктам. Ӹшкежӹ яжон ам пӓлӹ, но лӹмлӹ авторвлӓн (Игнатьев, Канюшков, Егоров дӓ весӹвлӓ) текствлӓ лошты яжо произведенивлӓм мон шӹм керд. Мам лыдынам - цилӓ утла скучна дӓ пропаганда йишвлӓ вел попазенӹт. Но, ӹнянем, сойток кӱкшӹ поэзи нӹнӹм тыргыжланен... Палшалтыдай техень пӓшӓм ӹштӓш... Кого тау!
ОтветитьУдалитьАнатолий Атюлов.
УдалитьВУЙВОРТЕМ
Ӹнгӹжӓвлӓ дон шӹкедӹл
Тура сирвлӓм кок покаш,
Вӓрӹн-вӓрӹнжӹ тӹргештӹл,
Йорта ӓнгыр шӹргӹ вашт.
Темӹн керддӹмӹ вӹд пӧртем.
Ышмам кӓрен выча лач.
Ӹлӹшташвлӓ йӹржӹ пӧрдӹн,
Пыраш цацат церот гач.
Ӹшкеӓт мӹнь ӓнгӹр ганьы
Йонгыш, пак талашем со.
Ӹлӹмашын соты тангыж
Шыпшеш токыжы процок.
Шанымашвлӓ, лач шӹдӹрвлӓ,
Вуйвӧртемӹшкем, валгалт,
Вӹсен сӓрнен, партьын тӹргӓт,
Ирӹк уке пыйыртат.
Теве эртӓ ӹлӹмашем-
Шӹжгӓ шӹдӹр вала вел.
Тагышакен кӱшӓн цӓшем
Лакен коды вет эче.
Паштекшок шынгалты весӹ
Вуйвӧртемӹш сотырак.
Тӹдӹ мӹлӓм раш келесӹш:
"Цӓшет тӹньӹн палнырак.
Тӧр пӓшӓштӹ пӱжвӹдетшӹм
Ит жӓлӓйӹ, лӱдде ке.
Шонгенм пӹтетӓт, ышетшӹ
Йӓллӓн воксе акат кел".
Сӹлнӹ шамак, сотын йылен,
Толын пырыш трӱкӹшток.
Шӱмеш пиш яргата тылым
Чӱктӹш тӹдӹ выртышток.
( "Кӱшӹл кымдемӹн корны" книгӓ гӹц, 31 стр., Йошкар-Ола, 2016, Мары книга изд-во).
Виталий Петухов
ШӸЖӸМ УЖМАШ
Шке цевержӹм анжен, ваштар
Тырынок амала.
А выргемжӹ, якшар лаштык,
Шоэн, ӱлӹк вала.
Тылан соты ӹлӹштӓшвлӓ
Укш гӹц ӹнде шӹлӹт.
...Анжен шалгыш ти нӓрӓштӓм,
Ӧрӹн, луды вӹлӹ.
Шӹкш дон нӓлмӹ гань сӹнзӓштӹ
Сылык лит тамалын.
Чучыт вилшӹ ӹлӹштӓшвлӓ
Шӹлшӹ ик цамала?
Ӓль ваштаржы, сӹлнӹ-кужы,
Тӹкнӹшӓт сӹнзӓэш,
Шке худажым угӹц ужынЮ
Ойхырен сынзалеш?
Ял лӹвӓлнӹ кишӹ ара
Ӹлӹштӓшвлӓ вӹлнӹ
Вӹцкӹж ялан, шим аржаан,
Шалга цевер вӹлӹ...
("Со пуры лижӹ" книгӓ гӹц, 70 стр.Йошкар-Ола,1990и, Мары книгӓ изд-во.).
Софроний Гайдов
КОРНЫ
Йыд ваштареш, ӓнят, лӓкмӹ корныш,
Керӓлок вӓл вазын кидеш сӓп?
Вуйыш пыра шанымаш тек тошты,
Кынам рвезӹ эче ылеш кӓп.
Кымда корны кеӓ Пуры докы,
Весӹ видӓ пасе вӓрвлӓ мыч.
Кымшы киӓ купан шӹргӹ лошты,
Рехенялтеш, шанет, акат пыч.
Пӹтаришӹш кеет ашкедмӓшеш,
Яклешт вазат, лиӓт кокшыштат.
А кымшышкы, эдем шагалмашеш,
Атат ли вет иктӹн шотыштат.
Пачеш корным пӹтӓришӹ ашкыл,
Сола йӹр соталгы тӹлзӹшкӓт.
Пыраш келеш ӹлӹмӓшӹн кашкыш,
Шоаш манын Марсын ӹрдӹшкӓт.
("Ир лыпш шыпшалмеш" книгӓ гӹц,14 стр.Йошкар-Ола, 2001и,Йошкар-Ола, Периодика Марий Эл.
ВУЙВӦРТЕМ- Ӧ буква доно сирӓлтеш
ОтветитьУдалитьПиш кого тау, шотеш пиштӹмӹ Надя! Цилӓ кым лыдышке уже блогыш лыктым. Эче вычем...) Поэзи, проза, беллетристика... цил йиш кырык марла, дӓ Кырык Сир гишӓн сирӹмӹ произведенийвлӓм сӹлнеш шотледӓ гӹнь пишок цилӓлӓн анжыктынем... Пӓшӓдӓ ашныжы!
ОтветитьУдалитьНиколай Володькин КОКЭН
ОтветитьУдалить...Мӹлӓм ак кел тӹ Париж,
Сан-Франсиско, Токио.
Окса ситӓ теве тиш:
Лач Кузьма гӹц токына...
Николай Володькин тенге fusk сирен.
Удалить...Мӹлӓм ак кел тӹ Париж,
Вашингтон ӓль Токио.
Окса ситӓ веле тиш:
Лач Кузьма гӹц токына...
Кимӹ варжӹ пышкыды лижӹ.
Мары халык пиш незерын кӹзӹт ӹленӓ ач...